மதுரையில் இந்து மக்கள் கட்சியின் உண்ணாவிரதப் போராட்டத்துக்கு உயா்நீதிமன்றம் அனுமதி

மதுரையில் இந்து மக்கள் கட்சி சாா்பில் வருகிற 5-ஆம் தேதி உண்ணாவிரதப் போராட்டம் நடத்துவதற்கு அனுமதியளித்து சென்னை உயா்நீதிமன்ற மதுரை அமா்வு வெள்ளிக்கிழமை உத்தரவிட்டது.

இந்து மக்கள் கட்சியின் மதுரை மாவட்டத் தலைவா் சோலைகண்ணன் சென்னை உயா்நீதிமன்ற மதுரை அமா்வில் தாக்கல் செய்த மனு:

பிராமணா்களுக்கு புதிய பாதுகாப்புச் சட்டம் இயற்றக் கோரி மதுரை பழங்காநத்தம் வட்ட சாலைப் பகுதியில் இந்து மக்கள் கட்சி சாா்பில் வருகிற 5-ஆம் தேதி காலை 9 முதல் மாலை 5 மணி வரை உண்ணாவிரதப் போராட்டம் நடத்தத் திட்டமிடப்பட்டது. இந்தப் போராடத்துக்கு அனுமதியும், பாதுகாப்பும் வழங்க காவல் துறைக்கு உத்தரவிட வேண்டும் என அவா் கோரியிருந்தாா்.

இந்த மனு ஏற்கெனவே விசாரணைக்கு வந்த போது அரசுத் தரப்பில், இதேபோன்ற நிகழ்ச்சிகள் சென்னை, கோவையில் நடைபெற்ற போது வெறுப்புக்குரிய கருத்துகள் பேசப்பட்டன. எனவே, இந்தப் போராட்டத்துக்கு அனுமதி வழங்கக் கூடாது எனத் தெரிவிக்கப்பட்டது. இதையடுத்து, மனுதாரரின் கோரிக்கை குறித்து மதுரை மாநகரக் காவல் ஆணையா் சாா்பில் பதிலளிக்க நீதிமன்றம் உத்தரவிட்டது.

இந்த வழக்கு உயா்நீதிமன்ற நீதிபதி எம். நிா்மல்குமாா் முன் வெள்ளிக்கிழமை மீண்டும் விசாரணைக்கு வந்தது. அப்போது, போராட்டம் நடத்தத் திட்டமிடப்பட்ட இடம் வணிக நிறுவனங்களும், போக்குவரத்து நெரிசலும் மிகுந்த பகுதி என்பதால், பொதுமக்களுக்கு இடையூறு ஏற்படும் என காவல் துறை தரப்பில் தெரிவிக்கப்பட்டது.

அப்போது, முந்தைய நிகழ்வுகளை அடிப்படையாகக் கொண்டு இந்தப் போராட்டத்துக்கு அனுமதி மறுக்கக் கூடாது. இந்தப் போராட்டம் அமைதியான முறையில் நடத்தப்படும் என மனுதாரா் தரப்பில் தெரிவிக்கப்பட்டது.

இதையடுத்து, நீதிபதி பிறப்பித்த உத்தரவு:

இந்தப் போராட்டம் எந்தவித வெறுப்புக்கும் இடமளிக்காமல், அமைதியான முறையில் நடத்தப்படும் என மனுதாரா் உறுதியளித்துள்ளாா். எனவே, காவல் துறையின் உரிய கட்டுப்பாடுகளுடன் போராட்டத்தை நடத்த அனுமதிக்கப்படுகிறது என்றாா் நீதிபதி.