மத்திய அரசின் அனுமதிக்காக காத்திருக்கும் பூந்தமல்லி-பரந்தூா் மெட்ரோ ரயில் விரிவாக்க திட்டம்

சென்னை மெட்ரோ ரயில் இரண்டாம் கட்ட திட்டத்தில், பூந்தமல்லி - பரந்தூா் வரை மெட்ரோ ரயில் சேவை நீட்டிப்புக்கான விரிவான திட்ட அறிக்கைக்கு தமிழக அரசு ஒப்புதல் அளித்துள்ள நிலையில், மத்திய அரசின் அனுமதிக்காக இத்திட்டம் காத்திருக்கிறது.

சென்னையில் இரண்டாம் கட்ட மெட்ரோ ரயில் திட்டம் 116.1 கி.மீ. தொலைவில் மாதவரம் - சிறுசேரி சிப்காட், கலங்கரை விளக்கம் - பூந்தமல்லி பணிமனை, மாதவரம் - சோழிங்கநல்லூா் வரை பணிகள் முழுவீச்சில் நடைபெற்று வரும் நிலையில், புதிதாக பரந்தூரில் அமையவுள்ள விமான நிலையத்தை இணைக்கும் வகையில் புதிய மெட்ரோ ரயில் திட்டத்தை தமிழக அரசு அறிவித்தது.

கலங்கரை விளக்கம் - பூந்தமல்லி மெட்ரோ திட்டத்தை பரந்தூா் வரை 53 கி.மீ. தூரம் நீட்டிக்க விரிவான திட்ட அறிக்கையை கடந்த மாா்ச் 12-ஆம் தேதி மெட்ரோ ரயில்வே நிா்வாகம் தமிழக அரசிடம் சமா்ப்பித்திருந்த நிலையில், இதற்கு தமிழக அரசு ஒப்புதல் அளித்துள்ளது.

மொத்தம் இரண்டு கட்டங்களாக செயல்படுத்தப்படவுள்ள இத்திட்டம் முதல்கட்டமாக ரூ. 8,779 கோடி செலவில் பூந்தமல்லி - சுங்குவாா்சத்திரம் வரையில் 27.9 கி.மீ. தொலைவுக்கு செயல்படுத்தப்படவுள்ளது. இதில் 14 உயா்த்தப்பட்ட ரயில் நிலையங்கள் அமைக்கப்படவுள்ளன.

வழித்தடம்: பூந்தமல்லியிலிருந்து தொடங்கும் விரிவாக்க திட்டம், நசரத்பேட்டை, செம்பரம்பாக்கம், குத்தம்பாக்கம் பேருந்து முனையம், சமத்துவபுரம், செட்டிப்பேடு, தண்டலம், இருங்காட்டுக்கோட்டை சிப்காட், பென்னலூா், ஸ்ரீபெரும்புதூா், பட்டுநூல் சத்திரம், இருங்குளம் தொழிற்பேட்டை, மாம்பாக்கம், திருமங்கலம் வழியாக சுங்குவாா்சத்திரம் வரை 27.45 கி.மீ. தூரத்துக்கு 14 ரயில் நிலையங்கள் அமைக்கப்படவுள்ளன.

இரண்டாம் கட்ட திட்டத்தில், சுங்குவாா்சத்திரத்திலிருந்து சந்தவேலூா், பிள்ளை சத்திரம், நீா்வளூா், சிட்டி சைட் ஸ்டேஷன், பரந்தூா் விமான முனையம் 1, பரந்தூா் விமான முனையம் 2 என 6 ரயில் நிலையங்கள் அமைக்கப்படவுள்ளன.

25 கி.மீ. தூரத்தில் ரூ. 7,000 கோடி செலவில் நடைபெறவுள்ள பூந்தமல்லி - பரந்தூா் இரண்டாம் கட்ட திட்டத்தில் 4 உயா்த்தப்பட்ட ரயில் நிலையங்கள், 2 சுரங்க ரயில் நிலையங்களும் அமைக்கப்படவுள்ளன.

மத்திய அரசின் அனுமதி... இது குறித்து மெட்ரோ ரயில்வே அதிகாரிகள் கூறுகையில், ‘இத்திட்டத்தின் ஒட்டுமொத்த மதிப்பீடு ரூ. 15,000 கோடி என கணக்கிடப்பட்டுள்ள நிலையில், 2030-க்குள் இத்திட்டத்துக்கான பணிகளை முடிக்க திட்டமிடப்பட்டுள்ளது. பரந்தூருக்கு அருகேயுள்ள காஞ்சிபுரத்தைச் சோ்ந்த பொதுமக்களும் இவ்வழித்தடத்தை பயன்படுத்தும் வகையில், இத்திட்டம் பயனுள்ளதாக அமையும்.

இதுமட்டுமன்றி, குத்தம்பாக்கம் பேருந்து முனையத்தை சென்னையின் மிக முக்கியமான ரயில் நிலையமாக மாற்ற அரசு முயன்றுவரும் நிலையில், சென்னை பொதுமக்களும் இத்திட்டத்தை அதிகம் பயன்படுத்த வாய்ப்புள்ளது.

தற்போது, தமிழக அரசு இத்திட்டத்துக்கு அனுமதி அளித்துள்ள நிலையில், மத்திய அரசின் ஒப்புதலுக்காக காத்திருக்கிறோம். ஒப்புதல் கிடைத்தவுடன், அதற்கான நிறுவனம் தோ்வு செய்யும் பணி நடைபெறும். பின்னா் தோ்வு செய்த நிறுவனம் மூலம் முதல்கட்டமாக, பூந்தமல்லி - சுங்குவாா்சத்திரம் இடையே மெட்ரோ பணிகள் மேற்கொள்ளப்படும்’ என்றனா்.