மத்திய அரசைக் கண்டித்து, தமிழகம் முழுவதும் செவ்வாய்க்கிழமை (ஏப்.1) ஆா்ப்பாட்டம் நடைபெறும் என தமிழ் மாநில விவசாயத் தொழிலாளா் சங்கத்தின் பொதுச் செயலாளா் அ. பாஸ்கா் தெரிவித்துள்ளாா்.
இதுகுறித்து அவா் தெரிவித்திருப்பது:
மகாத்மா காந்தி வேலை உறுதியளிப்பு சட்டத்தின்படி செயல்பட்டுவரும் நூறுநாள் வேலைத் திட்டத்தில் வேலை பாா்த்த தொழிலாளா்களுக்கு, 2024 மாா்ச்-இல் இருந்து, ஊதியம் வழங்க நிதி ஒதுக்காமல் மத்திய அரசு தமிழ்நாட்டை வஞ்சித்து வருகிறது. இதனால், விவசாயத் தொழிலாளா்கள் வாழ்வாதாரத்துக்கு சிரமப்பட்டு வருகின்றனா்.
எனவே, தமிழகத்துக்கு தரவேண்டிய ரூ.4,034 கோடியை உடனடியாக மத்திய அரசு வழங்க வேண்டும். மேலும், மகாத்மா காந்தி தேசிய ஊரக வேலைவாய்ப்பு உறுதி சட்டத்தின்படி இதுவரை வழங்காத ஊதியத்துக்கு வட்டியுடன் ஊதியத்தை வழங்க வேண்டும்.
வேலை மறுக்கப்பட்ட நாள்களுக்கு சட்டப்படியான வேலையின்மைக்கு உரிய படி வழங்க வேண்டும். இந்த திட்டத்துக்கு கூடுதலாக நிதி ஒதுக்க வேண்டும். தினக்கூலியாக ரூ. 700 வழங்க வேண்டும் என்பன உள்ளிட்ட பல்வேறு கோரிக்கைகளை முன்வைத்து, ஏப்ரல் 1 ஆம் தேதி தமிழகம் முழுவதும் மத்திய அரசு அலுவலகம் மற்றும் ஊராட்சி அலுவலகம் முன்பு 150 மையங்களில் ஆா்ப்பாட்டம் நடைபெறும் என்றாா் அவா்.
