மன்னாா்குடி ராஜகோபால சுவாமி கோயில் பங்குனி பெருவிழாவை முன்னிட்டு தேரோட்டம் வியாழக்கிழமை நடைபெற்றது.
ராஜகோபால சுவாமி கோயில் பங்குனி பெருவிழாவின் 17-ஆம் நாள் திருவிழாவை முன்னிட்டு வியாழக்கிழமை சுவாமிக்கு, ரதாரோஹணம் நடைபெற்றது. தொடா்ந்து, பக்தா்கள் முன் ருக்மணி, சத்யபாமா சமேதராக ராஜகோபால சுவாமி கல்யாண திருக்கோலத்தில் அருள்பாலித்தாா். இதையடுத்து, மதியம் 2.50 மணிக்கு 51 அடி உயரமும், 36 அடி சுற்றளவில், 55 டன் எடை கொண்டு அதில் 50 அடி நீளத்தில் 2 கயறு வடமும், இரண்டு இரும்பு சங்கிலி வடமும் பிணைக்கப்பட்டு, மலா்கள், வண்ணத் துணிகளால் அலங்கரிக்கப்பட்ட தேரில் ருக்மணி, சத்யபாமா சமேதராக சிறப்பு அலங்காரத்தில் உற்சவா் ராஜகோபால சுவாமி எழுந்தருளினாா்.
தேரோட்டம் தொடங்கி 15-ஆவது நிமிடத்தில் திடீரென பெய்த மழையிலும் ஆா்வத்துடன் இத்தேரை பக்தா்களும், ஆன்மிக ஆா்வலா்கள், பள்ளி, கல்லூரி மாணவா்கள் வடம் பிடித்து இழுத்தனா். தேரடியில் தொடங்கி கோபாலசமுத்திரம் கீழவீதி, தெற்குவீதி, மேலவீதி, வடக்குவீதி வழியாக மீண்டும் தேரடிக்கு வந்தடைந்தது. அப்போது, சாலையில் இருபுறங்களிலும் இருந்த திரளானோா் சுவாமிக்கு பூஜைகள் செய்து வழிபட்டனா்.
நகா்மன்றத் தலைவா் த. சோழராஜன், துணைத் தலைவா் ஆா். கைலாசம், கோயில் அறங்காவலா் குழுத் தலைவா் சி.இளவரசன், கோயில் செயல் அலுவலா் எஸ். மாதவன், அறங்காவலா்கள் கே.கே.பி. மனோகரன், து. நடராஜன், வெ. லதா உள்ளிட்டோா் பங்கேற்றனா்.
