திருவாடானை அருகே தொண்டியில் மத்திய பாதுகாப்பு படை வீரா்கள் சாா்பில் போதை எதிா்ப்பு விழிப்புணா்வு சைக்கிள் பேரணி சனிக்கிழமை நடைபெற்றது.
இதற்கு மத்திய பாதுகாப்பு படை வீரா்கள் துணை தளபதிகள் ஸ்ரீனிவாசன், மோகன் ஆகியோா் தலைமை வகித்தனா். இதில் சுமாா் 130 வீரா்கள் மேற்கு வங்கத்திலிருந்து தூத்துக்குடி வரையிலும் சைக்கிளில் பேரணியாகச் சென்று போதைப் பொருள்களால் ஏற்படும் தீமைகள் குறித்து விழிப்புணா்வு ஏற்படுத்துகின்றனா். தொண்டிக்கு வந்த இவா்களை, திருவாடானை வட்டாட்சியா் ஆண்டி, வருவாய் ஆய்வாளா் மேகமலை, கிராம நிா்வாக அலுவலா் நம்பு ராஜேஷ், வருவாய்த்துறை அதிகாரிகள், தனியாா் பள்ளி மாணவா்கள் வரவேற்றனா்.
இதுகுறித்து துணை தளபதி மோகன் செய்தியாளா்களிடம் கூறியதாவது:
பொதுமக்களிடம் போதை ஒழிப்பு குறித்து விழிப்புணா்வை ஏற்படுத்த இரண்டு குழுவினா் சைக்கிள் பேரணி செல்கின்றனா். மேற்கு வங்கம், குஜராத்திலிருந்து வரும் இந்த இரு குழுவினரும் வருகிற 31-ஆம் தேதி தூத்துக்குடியில் சந்தித்து அங்கு போதை ஒழிப்பு பிரசாரத்தில் ஈடுபடுகின்றனா் என்றாா்.
