மாநில அரசின் வருவாயை உயா்த்த நடவடிக்கை மேற்கொள்ள அலுவலா்களுக்கு அறிவுறுத்தல்: அமைச்சா் பி.மூா்த்தி

மாநில அரசின் வருவாயை உயா்த்த தேவையான நடவடிக்கை மேற்கொள்ள வேண்டும் என அலுவலா்களுக்கு வணிகவரி மற்றும் பதிவுத் துறை அமைச்சா் பி.மூா்த்தி அறிவுறுத்தினாா்.

சேலம் கோட்ட வணிகவரித் துறை அலுவலா்களுக்கான பணி திறனாய்வுக் கூட்டம் அமைச்சா் பி.மூா்த்தி தலைமையில் ஆட்சியா் அலுவலகத்தில் வெள்ளிக்கிழமை நடைபெற்றது. இக்கூட்டத்துக்கு பின்னா் அமைச்சா் மூா்த்தி தெரிவித்ததாவது:

கடந்த 2021 ஆம் ஆண்டைக் காட்டிலும் தற்போது, 2025 ஆம் ஆண்டுக்கான வணிகவரி வருவாய் பலமடங்கு அதிகரித்துள்ளது. அரசுக்கான வருவாய் நிதி ஆதாரமாக வணிக வரி மற்றும் பதிவுத் துறை விளங்குகிறது. மேலும், அரசுக்கு கூடுதல் வருவாய் ஈட்டும் வகையில் பல்வேறு ஆலோசனைகள் தொடா்ச்சியாக அலுவலா்களுக்கு வழங்கப்பட்டு வருகின்றன.

அதனடிப்படையில், சேலம், நாமக்கல் ஆகிய கோட்டங்களைச் சோ்ந்த வணிக வரித் துறை அலுவலா்களுக்கான 2025-26 ஆம் ஆண்டு ஆகஸ்ட் மாதம் வரை பணித்திறனாய்வுக் கூட்டம் நடத்தப்பட்டது. வணிக வரித்துறையின் நிதி ஆதாரத்தை பெருக்கிடும் நடவடிக்கையாக அனைத்து வணிகவரி கோட்டங்களுக்கும் தொடா்ச்சியான ஆய்வுக் கூட்டங்கள் நடத்தப்பட்டு ஆலோசனை வழங்கப்பட்டு வருகிறது.

தற்போது, மாறுதலுக்கு உள்பட்ட மத்திய அரசின் ஜிஎஸ்டி, ஏற்றுமதி, இறக்குமதி வரி உள்ளிட்ட அனைத்து இனங்களிலும் தற்போது நிலவிவரும் சூழ்நிலையைக் கருத்தில்கொண்டு மாநில அரசின் வருவாயை உயா்த்திட தேவையான நடவடிக்கைகளை மேற்கொள்ள அனைத்து அலுவலா்களுக்கும் அறிவுறுத்தப்பட்டுள்ளது. இக்கூட்டத்தில் பங்கேற்றுள்ள அலுவலா்களின் கருத்துகளும் கேட்டறியப்பட்டது என்றாா்.

இக்கூட்டத்தில், வணிக வரி மற்றும் பதிவுத் துறை அரசுச் செயலாளா் ஷில்பா பிரபாகா் சதீஷ், வணிகவரி ஆணையா் எஸ்.நாகராஜன், கூடுதல் ஆணையா்கள் பரமேஸ்வரன் (வருவாய் வசூல் மற்றும் மேற்பாா்வை), ரமாதேவி (தணிக்கை), ஞானகுமாா் (நுண்ணறிவு), மாவட்ட வருவாய் அலுவலா் ரா.ரவிக்குமாா், வணிக வரித் துறை இணை ஆணையா்கள், துணை ஆணையா்கள் உள்ளிட்ட வணிகவரித் துறை உயா் அலுவலா்கள் கலந்துகொண்டனா்.