மாநில சுயாட்சி, கூட்டாட்சிக்கு எதிரான மத்திய பாஜக அரசை வீழ்த்துவதே இலக்கு! -மாா்க்சிஸ்ட் மாநாட்டில் முதல்வா்

மாநில சுயாட்சி, கூட்டாட்சித் தத்துவத்துக்கு எதிராக உள்ள மத்திய பாஜக அரசை வீழ்த்துவதே நமது இலக்கு என தமிழக முதல்வா் மு.க.ஸ்டாலின் தெரிவித்தாா்.

மாா்க்சிஸ்ட் கம்யூனிஸ்ட் கட்சியின் 24-ஆவது அகில இந்திய மாநாட்டின் 2- ஆவது நாள் நிகழ்வாக ‘கூட்டாட்சிக் கோட்பாடே இந்தியாவின் வலிமை’ என்ற தலைப்பில் சிறப்புக் கருத்தரங்கம் மதுரை ராஜா முத்தையா மன்றத்தில் வியாழக்கிழமை நடைபெற்றது.

இந்த நிகழ்வில் தமிழக முதல்வா் மு.க.ஸ்டாலின் சிறப்பு விருந்தினராகக் கலந்து கொண்டு பேசியதாவது:

தூங்கா நகரமான மதுரை மாா்க்சிஸ்ட் கம்யூனிஸ்ட் கட்சியின் மாநாட்டின் காரணமாக சிவப்பு நகரமாகக் காட்சியளிக்கிறது. இது மகிழ்ச்சியைத் தருகிறது. ஏனெனில், திமுக கொடியில் பாதி சிவப்பு நிறம்தான். எங்களில் பாதியாக நீங்கள் உள்ளீா்கள்.

எல்லோருக்கும் எல்லாம் என்ற கொள்கையின் அடிப்படையில் திமுக செயல்பட்டு வருகிறது. இதை வலியுறுத்தியே கூட்டணியும் அமைகிறது. இதனடிப்படையில், கடந்த 2019-ஆம் ஆண்டு முதல் திமுக கூட்டணியில் மாா்க்சிஸ்ட் கம்யூனிஸ்ட் கட்சி இணைந்தே பயணிக்கிறது. இந்தக் கூட்டணியில் விரிசல் ஏற்படாத என சிலா் எதிா்பாா்க்கின்றனா். அவா்களின் எண்ணம் ஒருபோதும் நிறைவேறாது.

மறைந்த சீதாராம் யெச்சுரி அகில இந்திய அளவில் சிறந்த தலைவா்களில் குறிப்பிடத்தக்கவா். அவரது பெயரை மாநாட்டு மையத்துக்கு வைத்திருப்பது மிகவும் பொருத்தமானது. அவரது இழப்பு இந்த இயக்கத்துக்கு மட்டுமன்றி, நாட்டுக்கும் இழப்புதான். அவா் சமத்துவத்தைப் பேணுதல், மதவாதத்தை எதிா்ப்பது ஆகியவற்றை வாழ்வியல் கோட்பாடாக கொண்டு வாழ்ந்து மறைந்தவா்.

தற்போது கூட்டாட்சி என்ற சொல் மத்திய பாஜக அரசுக்குப் பிடிக்காத சொல்லாக மாறிவிட்டது. பல மாநிலங்களின் ஒன்றிணைப்பே இந்தியா. இதைக் கூறினால் மத்திய அரசுக்குப் பிடிக்கவில்லை. மாநிலங்களுக்கான உரிமையைத் தொடா்ந்து வலியுறுத்துவதால் தமிழகமும், கேரளமும் அதிகளவில் பாதிக்கப்படுகின்றன. மாநில சுயாட்சி என்பது திமுகவின் உயிா்க் கொள்கை. இதை அண்ணா, கருணாநிதி வழியில் இன்றுவரை நாம் பின்பற்றி வருகிறோம்.

ஒரே நாடு, ஒரே தோ்தல் என்கிற நடைமுறையை அமல்படுத்துவதில் மத்திய பாஜக அரசு தீவிரமாக உள்ளது. அதுமட்டுமன்றி, மாநில மொழிகளை அழிக்க நினைக்கும் பாசிச அரசாகவும் திகழ்கிறது. தற்போது பிரதமராக உள்ள நரேந்திர மோடி, குஜராத்தின் முதல்வராக இருந்த போது மாநில உரிமைகள் குறித்து தீவிரமாகப் பேசினாா். தொடா்ந்து, 3-ஆவது முறையாக பிரதமராகப் பொறுப்பேற்றுள்ள அவா், மாநில உரிமைகளை நிலைநாட்ட என்ன செய்தாா் என்பதை விளக்க வேண்டும்.

பாஜக ஆளும் மாநிலங்களுக்கு நிதியுதவி அதிகமாக வழங்கப்படுகிறது. அவா்களது கட்சி ஆட்சியில் இல்லாத மாநிலங்களில் நிறைவேற்றப்படும் சட்டங்களுக்கு அனுமதி வழங்குவதில்லை. ஆளுநா்கள் மூலம் அரசியல் செய்ய முயற்சிக்கின்றனா். அதுமட்டுமன்றி, கட்சிகளைப் பிளவுபடுத்துவது, கூட்டணிக்குள் குழப்பத்தை ஏற்படுத்துவது உள்ளிட்ட செயல்களிலும் ஈடுபடுகின்றனா். மாநிலங்களே இருக்கக் கூடாது என பாஜகவினா் நினைக்கின்றனா்.

பாஜக அரசால் பாதிக்கப்படும் மாநிலங்களான தமிழகம், கேரளம், கா்நாடகம், பஞ்சாப் உள்ளிட்ட மாநிலங்கள் ஒன்றிணைந்து கூட்டுக் குழுக் கூட்டம் நடத்தப்பட்டது. இந்தக் கூட்டத்தில் நிறைவேற்றப்பட்ட தீா்மானங்கள் மத்திய அரசுக்கு அனுப்பிவைக்கப்பட்டன. ஆனால், இதுவரை எந்தவித நடவடிக்கையும் எடுக்கப்படவில்லை.

மக்கள் நலன்களுக்கு எதிராக பாஜக தொடா்ந்து செயல்பட்டு வருகிறது. மத்திய பாஜக அரசை வீழ்த்தினால்தான் கூட்டாட்சித் தத்துவம் நிலைபெறும். மாநில சுயாட்சி, கூட்டாட்சித் தத்துவத்துக்கு எதிராக உள்ள மத்திய பாஜக அரசை வீழ்த்துவதே நமது இலக்கு என்றாா் அவா்.