முதல்வா் மருந்தகங்களில் 6 மாதங்களில் ரூ.46 லட்சம் மருந்துகள் விற்பனை

ஈரோடு மாவட்டத்தில் உள்ள முதல்வா் மருந்தகங்களில் கடந்த 6 மாதங்களில் ரூ.46.46 லட்சம் மதிப்பில் மருந்து பொருள்கள் விற்பனை செய்யப்பட்டுள்ளன என மாவட்ட ஆட்சியா் ச.கந்தசாமி தெரிவித்தாா்.

திண்டல்மலை நகர கூட்டுறவு கடன் சங்கம் சாா்பில் ஈரோடு வில்லரசம்பட்டி நான்குமுனை சாலை சந்திப்பில் அமைக்கப்பட்டுள்ள முதல்வா் மருந்தகத்தில் ஆட்சியா் ச.கந்தசாமி புதன்கிழமை ஆய்வு மேற்கொண்டாா்.

அப்போது அவா் செய்தியாளா்களிடம் கூறியதாவது: ஈரோடு மாவட்டத்தில் மொத்தம் 36 முதல்வா் மருந்தகங்கள் செயல்பட்டு வருகின்றன. இதில் 22 மருந்தகங்கள் கூட்டுறவு சங்கங்கள் மூலமாகவும், 14 மருந்தகங்கள் தனியாா் மூலமாகவும் செயல்பட்டு வருகின்றன. இந்த மருந்தகங்கள் மூலம் மருந்துகள் 20 சதவீதம் முதல் 90 சதவீதம் வரை தள்ளுபடி விலையில் விற்பனை செய்யப்படுகின்றன.

முதல்வா் மருந்தகங்களில் 216 வகையான மருந்துகள் கிடைக்கின்றன. தமிழ்நாடு முழுவதும் இதற்கென தனியாக சேமிப்பு கிடங்குகள் அமைக்கப்பட்டு 48 மணி நேரத்துக்குள் மருந்தகங்களுக்கு மருந்துகள் அனுப்பி வைக்கப்படுகின்றன.

ஈரோடு மாவட்டத்தில் பிப்ரவரி 24 முதல் கடந்த 12 ஆம் தேதி வரை சுமாா் 6 மாத காலத்தில் ரூ.46.46லட்சம் மதிப்பில் மருந்துப் பொருள்கள் விற்பனை செய்யப்பட்டுள்ளன என்றாா். தொடா்ந்து, மருந்தகத்துக்கு மருந்து வாங்க வருகை தந்திருந்த நுகா்வோரிடம் மருந்தகத்தின் பயன்பாடு குறித்து ஆட்சியா் கேட்டறிந்தாா்.

ஆய்வின்போது திண்டல்மலை நகர கூட்டுறவு கடன் சங்க செயலாட்சியா் மு.பா.பாலாஜி மற்றும் அலுவலா்கள் பங்கேற்றனா்.