மகாராஷ்டிர மாநிலம் மும்பையில் போதைப் பொருள் வழக்கில் கைதான 8 பாகிஸ்தானியர்களுக்கு 20 ஆண்டுகள் சிறைத் தண்டனை வழங்கப்பட்டுள்ளது.
கடந்த 2015 ஆம் ஆண்டு குஜாரத் - மகாராஷ்டிரா கடல்பகுதியில் பாகிஸ்தானியர்கள் பயணித்த படகு ஒன்று இந்திய கடற்படையினரால் சுற்றிவளைக்கப்பட்டது. அப்போது அவர்கள் அதில் மேற்கொண்ட சோதனையின்போது அந்த படகிலிருந்து 232 கிலோ அளவிலான சுமார் ரூ.6.96 கோடி மதிப்புள்ள ஹெராயின் இருப்பது கண்டுப்பிடிக்கப்பட்டது.
பின்னர் அந்த போதைப் பொருளுடன் தொடர்புடைய 8 பாகிஸ்தானியர்கள் கைதுசெய்யப்பட்டதுடன் அவர்கள் வைத்திருந்த 3 சாட்டிலைட் போன்களும், ஜி.பி.எஸ் வரைப்படமும் மற்றும் சில மின்னனு சாதனங்களும் கைப்பற்றப்பட்டது.
அவர்களிடமிருந்து பறிமுதல் செய்யப்பட்ட போதைப் பொருளை ஆய்வகத்திற்கு அனுப்பி சோதனை செய்ததில் அது ஹெராயின்தான் என்று உறுதி செய்யப்பட்டது.
இதையும் படிக்க: உலகப் போர் தாக்குதலில் உயிர் தப்பிய மருத்துவர்: 103 வயதில் மரணம்!
இதனைத் தொடர்ந்து, கைது செய்யப்பட்ட அவர்கள் 8 பேரும் தெற்கு மும்பையின் யெல்லோ கேட் காவல்துரையினரிடம் ஒப்படைக்கப்பட்டனர்.
இந்நிலையில், நீதிபதி சசிகாந்த் பங்கர் தலைமையிலான சிறப்பு நீதிமன்றம் 8 பாகிஸ்தானியர்களுக்கும் போதைப் பொருள் தடுப்புச் சட்டத்தின் கீழ் தலா 20 ஆண்டுகள் சிறைத் தண்டனையும் ரூ.2 லட்சம் அபராதமும் விதித்துள்ளது.
குற்றவாளிகள் தரப்பில் வாதாடிய வழக்கறிஞர் குறைந்தப்பட்ச தண்டனை வேண்டிய நிலையில், போதைப் பொருள் கடத்துபவர்களுக்கு பாடமாக அமைய வேண்டும் என அவர்கள் 8 பேருக்கும் அதிகபட்ச தண்டனை விதிக்கப்பட்டிருப்பதாகக் கூறப்படுகிறது.
