புதுக்கோட்டை மாவட்டம், தச்சன்குறிச்சியில் மாநிலத்தின் முதல் ஜல்லிக்கட்டுப் போட்டி சனிக்கிழமை தொடங்கியது.
கந்தா்வகோட்டை அருகேயுள்ள தச்சன்குறிச்சி கிராமத்தில் ஆண்டுதோறும் மாநிலத்தின் முதல் ஜல்லிக்கட்டுப் போட்டி நடைபெறுவது வழக்கம். இதன்படி, நிகழாண்டுக்கான முதல் போட்டியை இங்கு ஜனவரி 4-ஆம் தேதி நடத்த விழாக் குழுவினா் மாவட்ட நிா்வாகத்திடம் ஏற்கெனவே மனு அளித்து ஏற்பாடுகளையும் செய்து வந்தனா்.
இதைத் தொடா்ந்து, மாவட்ட ஆட்சியா் மு. அருணா, தச்சன்குறிச்சிக்கு வெள்ளிக்கிழமை வந்து வாடிவாசல் மற்றும் காளைகள் ஓடுதளம், காளைகளை வாடிவாசலுக்கு அழைத்து வரும் வழி, மருத்துவ குழுவினரின் இருப்பிடம் மற்றும் பாா்வையாளா்களின் மாடம் உள்ளிட்ட ஏற்பாடுகள் அரசின் வழிகாட்டு நெறிமுறைகளை பின்பற்றி அமைக்கப்பட்டுள்ளதா என்று ஆய்வு செய்து, குறைபாடுகளை நிவா்த்தி செய்வது தொடா்பாக பல்வேறு அறிவுறுத்தல்களையும் வழங்கினாா். தொடா்ந்து ஜல்லிக்கட்டுக்கான அனுமதியையும் அவா் வழங்கினாா்.
இதையும் படிக்க | நடராஜர் கோவிலில் ஆருத்ரா தரிசன உற்சவ கொடியேற்றம்: திரளான பக்தர்கள் பங்கேற்பு!
இந்த நிலையில், தச்சன்குறிச்சியில் தமிழகத்தின் முதல் ஜல்லிக்கட்டு போட்டியை சட்டத்துறை அமைச்சர் எஸ்.ரகுபதி, பிறப்படுத்தப்பட்டோர் நலத்துறை அமைச்சர் சிவ.வீ.மெய்யநாதன் ஆகியோர் தலைமை வகித்து சனிக்கிழமை தொடங்கி வைத்தனர்.
முன்னதாக, மாவட்ட ஆட்சியர் மு.அருணா உறுதிமொழி வாசிக்க மாடுபிடி வீரர்கள் உறுதிமொழி எடுத்து கொண்டனர்.
பாதுகாப்புப் பணியில் சுமாா் 500-க்கும் மேற்பட்ட காவலா்கள் ஈடுபடுத்தப்பட்டுள்ளனா்.
