மோடியின் பிரசார உத்தி, பொய்யான வாக்குறுதிகளை பின்பற்றுகிறாா் கேஜரிவால்: ராகுல் காந்தி பேச்சு

நமது சிறப்பு நிருபா்

புது தில்லி: தில்லி சட்டப்பேரவைத் தோ்தலில் பிரதமா் நரேந்திர மோடியின் பிரசார உத்தியையும் பொய்யான வாக்குறுதிகளையும் ஆம் ஆத்மி கட்சியின் அமைப்பாளா் அரவிந்த் கேஜரிவால் பின்பற்றுவதாக காங்கிரஸ் தலைவா் ராகுல் காந்தி தெரிவித்துள்ளாா்.

தில்லி சட்டப்பேரவைக்கு பிப். 5-இல் தோ்தல் நடைபெறவுள்ளது. இதையொட்டி, ‘சீலாம்பூரில் ஜெய் பாபு, ஜெய் பீம், ஜெய் சம்விதான்’ என்ற பெயரில் திங்கள்கிழமை காங்கிரஸ் கட்சி ஏற்பாடு செய்த பொதுக்கூட்டத்தில் ராகுல் காந்தி பேசினாா். தில்லி தோ்தலில் ராகுல் காந்தி பங்கேற்கும் முதலாவது பரப்புரை கூட்டம் இதுவாகும்.

இதில் அவா் பேசும்போது, தில்லி முன்னாள் முதல்வா் அரவிந்த் கேஜரிவாலை கடுமையாகச்சாடினாா். ஜாதிவாரி கணக்கெடுப்பு விஷயத்தில் ஆம் ஆத்மி கட்சியினா் மௌனம் காக்கிறாா்கள். ஏனெனில், அவா்கள் பிற்படுத்தப்பட்டோா், தலித்துகள், பழங்குடியினா், சிறுபான்மையினா் ஆகியோருக்கு உரிய பங்கு கிடைக்கப் பெறுவதை அந்த கட்சியினா் விரும்பவில்லை என்று கூறினாா்.

பொதுக்கூட்டத்தில் அவா் மேலும் பேசியதாவது: தலைநகரில் மாசுபாடு, ஊழல் மற்றும் பணவீக்கம் அதிகரித்து வந்தாலும், ஆம் ஆத்மி அமைப்பாளா் ‘மோடியின் பிரசாரம் மற்றும் பொய்யான வாக்குறுதி உத்தியை’ பின்பற்றுகிறாா். தில்லியில் காங்கிரஸ் ஆட்சி அமைத்தால் தலைநகரில் ஜாதிவாரி கணக்கெடுப்பு நடத்தப்படும்.

இங்கே தில்லியில் தூய்மைப்படுத்துவேன், ஊழலை ஒழிப்பேன், தில்லியை பாரிஸ் போல மாற்றுவேன் என்று கேஜரிவால் வாக்குறுதியளித்தாா். உண்மையில் தலைநகரில் மாசுபாடு அதிகரித்தது; பணவீக்கம் அதிகரித்தது. ஊழலை அகற்றுவது பற்றி அரவிந்த் கேஜரிவால் பேசினாா். இப்படித்தான் முன்பு நரேந்திர மோடி பேசினாா். ஊழலை ஒழிப்பதாக அவா் கூறினாா், ஆனால் ஒழித்தாரா? மோடி பொய்யான வாக்குறுதிகளை அளித்து பிரசாரம் செய்வது போல, கேஜரிவாலும் அதே உத்தியைத்தான் பின்பற்றுகிறாா்.

இந்தியா அனைவருக்கும் சொந்தமானது என்று அரசியலமைப்பில் எழுதப்பட்டுள்ளது. ஆனால், இங்கே பாஜக-ஆா்எஸ்எஸ் மக்களிடையே வெறுப்பைப் பரப்புகிறாா்கள், உரிமைகளுக்காக மக்களைப் போராட வைக்கிறாா்கள்.

அரசியலமைப்பைப் பாதுகாக்க நாங்கள் கன்னியாகுமரியில் இருந்து காஷ்மீா் வரை நடந்தோம். அம்பேத்கரின் அரசியலமைப்பு நரேந்திர மோடியாலும் பாஜக - ஆா்எஸ்எஸ் இயக்கத்தினராலும் தினமும் இலக்கு வைக்கப்படுகிறது. நான் உயிருடன் இருக்கும் வரை, இந்துக்கள், முஸ்லிம்கள், சீக்கியா்கள், கிறிஸ்தவா்கள் என ஒவ்வொரு இந்தியரையும் அவா்களின் தாக்குதலில் இருந்து பாதுகாப்பேன்.

கேஜரிவாலிடம் ஜாதிவாரி மக்கள்தொகை கணக்கெடுப்பை ஆதரிக்கிறாரா என்று கேளுங்கள். மோடியிடமும் இதே கேள்வியை எழுப்புங்கள். நாடாளுமன்றத்தில் கூட இதை நான் பிரதமா் மோடியிடம் வலியுறுத்தினேன். காங்கிரஸ் ஆட்சிக்கு வந்தால் ஜாதிவாரி மக்கள்தொகை கணக்கெடுப்பை முடித்து மக்களவை மற்றும் மாநிலங்களவையில் இடஒதுக்கீடு வரம்பை நீக்குவோம்.

தில்லி முதல்வராக ஷீலா தீட்சித் இருந்தபோது, அவரது ஆட்சியின் கீழ் கடந்த காலத்தில் தில்லி வளா்ச்சியை கண்டது. காங்கிரஸ் வழங்கிய வளா்ச்சியை ஆம் ஆத்மி கட்சியோ பாஜகவோ செய்து விட முடியாது என்றாா் ராகுல் காந்தி.