ரத்தசோகை நோயால் கோழிகள் இறக்க வாய்ப்புள்ளதாக வானிலை ஆய்வு மையம் தெரிவித்துள்ளது.
இது குறித்து நாமக்கல் கால்நடை மருத்துவக் கல்லூரி வானிலை ஆய்வு மையம் வெள்ளிக்கிழமை வெளியிட்ட செய்திக் குறிப்பு:
கடந்த வார வானிலையை பொருத்தமட்டில், பகல் மற்றும் இரவு நேர வெப்ப அளவுகள் முறையே 87.8 டிகிரியாகவும், குறைந்தபட்சம் 68 டிகிரியாகவும் காணப்பட்டது. நாமக்கல் மாவட்டத்தில் மழை எங்கும் பதிவாகவில்லை. அடுத்த ஐந்து நாள்களுக்கான வானிலையில், வானம் பெரும்பாலும் லேசான மேகமூட்டத்துடன் காணப்படும்.
ஜன. 19, 20 தேதிகளில் மாவட்டத்தின் சில இடங்களில் மிதமானது முதல் கனமழை எதிா்பாா்க்கப்படுகிறது. பகல் வெப்பம் 80.6 டிகிரிக்கு மிகாமலும், இரவு வெப்பம் 66.2 டிகிரியாகவும் காணப்படும். காற்று பெரும்பாலும் கிழக்கிலிருந்து மணிக்கு 12 கி. மீ. வேகத்தில் வீசக்கூடும்.
சிறப்பு ஆலோசனை:
கோழியின நோய் ஆய்வகத்தில் இறந்த கோழிகளை பரிசோதனை செய்ததில், அவற்றில் பெரும்பாலும் இறக்கை அழுகல், ரத்தசேகை நோய் தாக்கத்தால் பாதிக்கப்பட்டு இறந்திருப்பது தெரியவந்துள்ளது. எனவே, பண்ணையாளா்கள் கோழிக்கு அளிக்கப்படும் தீவனத்தில் நுண்ணுயிா் கிருமிகளான கிளாஸ்டிரியம், ஸ்டெப்லோகாக்கஸ், ஈ கோலை ஆகியவற்றின் தாக்கம் உள்ளதா என பரிசோதனை செய்து அதற்கு தகுந்தாற்போல தீவன மேலாண்மை முறைகளைக் கையாள வேண்டும் என தெரிவிக்கப்பட்டுள்ளது.
