நெய்வேலி: கடலூா் மாவட்டம், வடலூா் சத்திய ஞான சபையில் தைப்பூச ஜோதி தரிசனப் பெருவிழா திங்கள்கிழமை கொடியேற்றத்துடன் தொடங்கியது.
ஜோதி தரிசன நிகழ்ச்சி செவ்வாய்க்கிழமை (பிப்.11) நடைபெறுகிறது. ஜீவ காருண்யத்தை உலகுக்கு எடுத்துரைத்த, வள்ளலாா் என்றழைக்கப்படும் ராமலிங்க சுவாமிகள் வடலூரில் சத்திய ஞான சபையை நிறுவினாா்.
இங்கு, ஆண்டுதோறும் தைப்பூச பெருவிழா விமரிசையாக நடைபெறுவது வழக்கம். இதையொட்டி நடைபெறும் ஜோதி தரிசனத்தைக் காண லட்சக்கணக்கானோா் வடலூருக்குத் திரண்டு வருவா்.
நிகழாண்டு 154-ஆவது தைப்பூச ஜோதி தரிசனப் பெருவிழா திங்கள்கிழமை கொடியேற்றத்துடன் தொடங்கியது. அதிகாலை 5 மணியளவில் அருள்பெருஞ்ஜோதி அகவல் பாராயணம் பாடப்பட்டது. காலை 7.30 மணியளவில் தருமச் சாலை அருகே சன்மாா்க்கக் கொடியேற்றும் நிகழ்ச்சி நடைபெற்றது.
இதையடுத்து, மருதூரில் வள்ளலாா் பிறந்த இல்லம், தண்ணீரால் விளக்கு எரியச் செய்த கருங்குழி, வள்ளலாா் சித்தி பெற்ற மேட்டுக்குப்பம் ஆகிய இடங்களிலும் சன்மாா்க்க கொடி ஏற்றப்பட்டது.
இதையடுத்து, காலை 10 மணியளவில் சத்திய ஞான சபையில் கொடியேற்றம் நடைபெற்றது.
முன்னதாக, தெய்வ நிலையத்துக்கு இடம் வழங்கிய பாா்வதிபுரம் கிராம மக்கள், வள்ளலாா் பயன்படுத்திய பொருள்கள் கொண்ட அலங்கரிக்கப்பட்ட பல்லக்கை சுமந்து, பலவகைப் பழங்கள், சீா்வரிசைப் பொருள்களுடன் ஊா்வலமாக கொடிமரத்தின் அருகே திரண்டனா்.
அப்போது அங்கு கூடியிருந்தவா்கள், ‘அருட்பெருஞ்ஜோதி அருட்பெருஞ்ஜோதி, தனிப்பெருங்கருணை அருட்பெருஞ்ஜோதி’ என்ற வள்ளலாரின் பாடலைப் பாடினா். பின்னா், வள்ளலாரின் கொடி பாடல்களை பாடியபடி சன்மாா்க்கக் கொடி ஏற்றப்பட்டது.
இதையடுத்து, அந்தப் பல்லக்கு சத்திய ஞான சபையை வலம் வந்தது. விழாவின் முக்கிய நிகழ்வான ஜோதி தரிசனப் பெருவிழா செவ்வாய்க்கிழமை நடைபெறுகிறது. முதல் தரிசனம் காலை 6 மணிக்கு நடைபெறுகிறது. தொடா்ந்து, காலை 10 மணி, பிற்பகல் ஒரு மணி, இரவு 7 மணி, 10 மணி, மறுநாள் (புதன்கிழமை) அதிகாலை 5.30 மணிக்கு என 6 காலங்களில் 7 திரைகளை நீக்கி ஜோதி தரிசனம் காண்பிக்கப்படும்.
போக்குவரத்து மாற்றம்... வடலூா் தைப்பூச ஜோதி தரிசன விழாவையொட்டி, வடலூரில் செவ்வாய்க்கிழமை காலை முதல் வாகனப் போக்குவரத்து மாற்று வழியில் இயக்க ஏற்பாடு செய்யப்பட்டுள்ளது.
பாதுகாப்பு பணியில் 1,500 போலீஸாா்... வடலூா் வள்ளலாா் தெய்வ நிலையத்தில் நடைபெறும் ஜோதி தரிசன விழாவில் குற்றம் மற்றும் திருட்டு சம்பவங்களை கட்டுப்படுத்தவும், போக்குவரத்தை ஒழுங்குபடுத்தும் பணியில் 1,500 போலீஸாா் ஈடுபடவுள்ளனா்.
சிறப்பு பேருந்துகள் இயக்கம்... விழாவையொட்டி வடலூருக்கு கடலூா், சிதம்பரம், காட்டுமன்னாா்கோவில், விருத்தாச்சலம், நெய்வேலி, பண்ருட்டி உள்ளிட்ட பகுதிகளில் இருந்து சிறப்புப் பேருந்துகள் திங்கள்கிழமை மாலை முதல் இயக்கப்பட உள்ளதாக அரசுப் போக்குவரத்துக் கழக அதிகாரி தெரிவித்தாா்.
சித்தி வளாகத் திருவறை தரிசனம்... வள்ளலாா் சித்தி பெற்ற மேட்டுக்குப்பத்தில் சித்தி வளாகத் திருவறை தரிசனம் வியாழக்கிழமை பிற்பகல் 12 மணி முதல் மாலை 6 மணி வரை நடைபெற உள்ளது.
