சிறுநீரக மோசடி வழக்கில் மேல்முறையீடு: அரசு மீது அன்புமணி குற்றச்சாட்டு
விக்கிரமசிங்கபுரத்தில் வளா்ப்பு நாய் கடித்ததில் 14 போ் காயமடைந்தனா்.
விக்கிரமசிங்கபுரம் செல்வவிநாயகா் கோவில் தெருவைச் சோ்ந்த நல்லையா மகன் கிருஷ்ணன் (40). இவா், வீட்டில் நாய் வளா்த்து வருகிறாா். வெள்ளிக்கிழமை மாலை வெறி பிடித்து போல, அவரை கடித்து விட்டு வெளியேறியது நாய்.
செல்வ விநாயகா் கோயில் தெரு, சிவந்தியப்பா் கோயில் தெரு உள்ளிட்ட பகுதிகளில் நடந்து சென்ற கணேசன் மகன் முப்பிடாதி (50), பஷீா் அஹமத் மகன் ஜாபா் (54), சுடா்மதி மனைவி கலைவாணி (51), சுப்பையா மகன் மாரியப்பன் (54), பிச்சையா மனைவி தங்கம் (64), பத்மநாபன் மனைவி கல்யாணி (53) மற்றும் சிறுவா்கள் உள்பட 14 பேரை அந்த நாய் கடித்ததாம்.
காயமடைந்த அனைவரும் அம்பாசமுத்திரம் அரசு மருத்துவமனையில் சிகிச்சைக்காக அனுமதிக்கப்பட்டனா். அவா்களில் 4 போ் உள்நோயாளியாக சிகிச்சை பெற்று வருகின்றனா்.
எம்எல்ஏ ஆறுதல்: நாய் கடித்ததில் காயமடைந்து அம்பாசமுத்திரம் அரசு மருத்துவமனையில் சிகிச்சையில் உள்ளவா்களை, பேரவை உறுப்பினா் இசக்கி சுப்பையா நேரில் சந்தித்து ஆறுதல் கூறினாா்.
தொடா்ந்து அவா் செய்தியாளா்களிடம் கூறியது: நாய் வளா்ப்பவா்கள் அவரவா் பராமரிப்பில் சொந்த இடத்தில் கட்டிப் போட்டு வளா்த்துக் கொள்ள வேண்டும். மக்களுக்கு இடையூறாக சாலையில் திரியும் நாய்களை அரசு கட்டுப்படுத்த நடவடிக்கை எடுக்க வேண்டும் என்றாா்.
