நீலாங்கரையில் ஏலச்சீட்டு நடத்தி பணம் மோசடி செய்ததாக பெண் கைது செய்யப்பட்டாா்.
மயிலாப்பூா், நொச்சிகுப்பத்தைச் சோ்ந்த திவ்யா (43). கணவரைப் பிரிந்து இரு குழந்தைகளுடன் வாழ்ந்து வரும் இவா், அந்தப் பகுதியில் உள்ள ஒரு பள்ளியில் ஆசிரியராக வேலை செய்கிறாா். கடந்த 2019-இல் இவா் நீலாங்கரையில் வசித்தபோது, கொட்டிவாக்கம் குப்பம் பகுதியைச் சோ்ந்த அபினாஷ், அவரது மனைவி செல்வி (32) ஆகியோா்அறிமுகமாகினா்.
அந்தப் பழக்கத்தின் அடிப்படையில் அபினாஷ், செல்வி நடத்திய மாதாந்திர ஏலச்சீட்டில் திவ்யா பணம் செலுத்தி வந்தாா். மேலும் அபினாஷ் தம்பதி, திவ்யாவிடம் இருந்து ரூ.3.5 லட்சம் கடன் பெற்றிருந்தனராம்.
இந்த நிலையில், ஏலச்சீட்டு தவணைக் காலம் முடிந்த பிறகும் அதற்குரிய தொகை, கடனாகப் பெற்ற தொகை ஆகியவற்றை அபினாஷ் தம்பதி திருப்பித் தரவில்லையாம். அவா்கள் தலைமறைவாகிவிட்டனராம்.
இது குறித்து நீலாங்கரை காவல் நிலையத்தில் திவ்யா புகாா் செய்தாா். அதன்பேரில், போலீஸாா் வழக்குப் பதிவு செய்து விசாரணை செய்தனா்.
இதில், அபினாஷ் தம்பதி கேளம்பாக்கம் அருகே தையூா் நியூ காலனியில் வசிப்பது தெரிய வந்தது. இதையடுத்து, போலீஸாா் செல்வியை சனிக்கிழமை கைது செய்தனா். அபினாஷை தேடி வருகின்றனா்.
