விவசாயிகளுக்கு மானியத்தில் வேளாண் இயந்திரங்கள்

மயிலாடுதுறையில், வேளாண்மைப் பொறியியல் துறை சாா்பில் விவசாயிகளுக்கு வேளாண் இயந்திரங்கள் மானிய விலையில் வழங்கப்பட்டன.

மாவட்ட ஆட்சியா் அலுவலக வளாகத்தில் வேளாண் இயந்திரங்கள் மற்றும் கருவிகள் குறித்த விழிப்புணா்வு முகாம் வியாழக்கிழமை நடைபெற்றது. மாவட்ட அளவில் நடைபெற்ற இம்முகாமில், ஆட்சியா் ஹெச்.எஸ். ஸ்ரீகாந்த் தலைமை வகித்து, மயிலாடுதுறை எம்எல்ஏ எஸ். ராஜகுமாா் முன்னிலையில் 11 விவசாயிகளுக்கு ரூ.11.95 லட்சம் மதிப்பிலான வேளாண் இயந்திரங்களை வழங்கினாா்.

பின்னா் அவா் கூறியது:

டிராக்டா்கள், நெல் மற்றும் கரும்பு அறுவடை இயந்திரங்கள், பவா் டில்லா்கள் போன்ற வேளாண் இயந்திரங்களும், விசை களையெடுக்கும் கருவி, ரோட்டவேட்டா் மற்றும் இதர உழவுக் கருவிகளும் விவசாயிகளால் பெருமளவு பயன்படுத்தப்படுகின்றன. இந்த இயந்திரங்களும், கருவிகளும் வேளாண்மைப் பொறியியல் துறையின் மூலம் விவசாயிகளுக்கு மானியத்திலும் வழங்கப்படுகின்றன.

அனைத்து வேளாண் இயந்திரங்கள் மற்றும் கருவிகளின் முறையான பயன்பாடு மற்றும் பராமரிப்பு முறைகள் குறித்து விவசாயிகளுக்கு விழிப்புணா்வு ஏற்படுத்த வேளாண்மை உழவா் நலத் துறை அமைச்சரால் சட்டப் பேரவையில் 2025-2026-ஆம் ஆண்டுக்கான வேளாண் நிதிநிலை அறிக்கையில் தெரிவிக்கப்பட்டது.

இதைத்தொடா்ந்து, மயிலாடுதுறை மாவட்ட வேளாண்மைப் பொறியியல் துறை மற்றும் தனியாா் வேளாண் இயந்திரங்கள் தயாரிப்பு நிறுவனங்கள் இணைந்து இவ்விழிப்புணா்வு முகாமை நடத்தியது என்றாா்.

நிகழ்ச்சியில், வேளாண்மை துறை இணை இயக்குநா் ஜெ. சேகா், வேளாண்மை பொறியியல் துறை உதவி செயற்பொறியாளா் நடராஜன் உள்ளிட்டோா் கலந்து கொண்டனா்.