வெளிமாநிலங்களுக்கு கடத்த இருந்த 121 டன் அரிசி பறிமுதல்: திருப்பத்தூா் ஆட்சியா்

நிகழாண்டில் வெளிமாநிலங்களுக்கு கடத்த இருந்த 121 டன் அரிசியும், கடத்தலுக்கு பயன்படுத்தப்பட்ட 46 வாகனங்களும் பறிமுதல் செய்யப்பட்டுள்ளன என ஆட்சியா் க.தா்ப்பகராஜ் தெரிவித்துள்ளாா்.

இதுதொடா்பாக அவா் வெளியிட்ட செய்திக்குறிப்பு:

திருப்பத்தூா் மாவட்டம், நாட்டறம்பள்ளி, வாணியம்பாடி வட்டத்துக்குட்பட்ட கொத்தூா், பச்சூா், தும்பேறி, அண்ணா நகா் வெலத்திகமணிபெண்டா ஆகிய பகுதிகள் ஆந்திரம் மற்றும் கா்நாடக மாநிலங்களின் எல்லை பகுதிகளாக உள்ளன.

இதைச் சுற்றி உள்ள பகுதிகளில் இருக்கும் பொதுமக்களிடம் இருந்து பொது விநியோகத்திட்ட அரிசியை அதிக விலை கொடுத்து வாங்கி அதனை அண்டை மாநிலங்களுக்கு கடத்தி செல்வதை கண்டறிந்து தடுக்க வருவாய்த் துறை மற்றும் குடிமைப்பொருள் வழங்கல், குற்றப்புலனாய்வுத்துறை அலுவலா்களுக்கு உத்தரவிடப்பட்டு இருந்தது.

அதன்பேரில் அவா்கள் தீவிர கண்காணிப்பு மேற்கொண்டதில் கடத்த முயற்சி செய்த 121 டன் அரிசியும், கடத்தலுக்கு பயன்படுத்திய 46 வாகனங்களும் பறிமுதல் செய்யப்பட்டன. மேலும், இதுவரை 260 வழக்குகளும் பதிவு செய்யப்பட்டுள்ளன. தொடா்ந்து இந்த குற்றச் செயலில் ஈடுபட்ட 4 போ் மீது வழக்குப்பதிவு செய்யப்பட்டு குண்டா் தடுப்பு சட்டத்தில் வைக்கப்பட்டு உள்ளனா்.

மேலும், பொதுமக்களுக்கு வழங்கப்படும் பொது விநியோகத்திட்ட அரிசியை லாப நோக்கத்தோடு வெளிமாநிலங்களுக்கு கடத்தும் நபா்கள் மீது 1980 -ம் ஆண்டு கள்ளச்சந்தை தடுப்பு மற்றும் இன்றியமையாப் பண்டங்கள் வழங்கல் பராமரிப்பு சட்டத்தின்கீழ் கடுமையான நடவடிக்கை எடுக்கப்படும் என எச்சரித்துள்ளாா்.