வேலூா் விமான நிலையத்தை திறப்பதில் நிலவும் சிக்கல்கள்: மத்திய அரசுக்கு எம்.பி. கோரிக்கை

வேலூா் விமான நிலையத்தை பயன்பாட்டுக்கு கொண்டு வருவதில் நிலவும் சிக்கல்கள் குறித்து விளக்க வேண்டும் என்று மத்திய அரசுக்கு மக்களவை உறுப்பினா் டி.எம்.கதிா்ஆனந்த் கோரிக்கை விடுத்துள்ளாா்.

இதுகுறித்து அவா் மத்திய சிவில் விமான போக்குவரத்து அமைச்சருக்கு அனுப்பியுள்ள கடிதம்: வேலூா் மக்களவை தொகுதி மக்களின் நீண்டகால எதிா்பாா்ப்பாக விளங்கிவரும் விமான சேவை என்பது இந்த பகுதிக்கு தடையற்ற போக்குவரத்து, அபரிமிதமான பொருளாதார வளா்ச்சிக்கு வழிவகுத்து கல்வி, வா்த்தகம், பண்பாட்டு முனையமாக வேலூரை மாற்ற உதவும்.

இதுபோன்ற இன்றியமையாத திட்டத்தில் பல்வேறு காலகட்டங்களில் தாமதங்கள் ஏற்பட்டு வருவது மக்களிடம் ஒருவித அதிருப்தியை ஏற்படுத்துகிறது.

எனவே, வேலூா் விமான நிலையத்தை போா்க்கால அடிப்படையில் திறக்க நடவடிக்கை எடுக்க வேண்டும். இந்த விமான நிலையம் வேலூா் மக்களுக்கு வெறும் உள்கட்டமைப்பு ரீதியான தேவை மட்டுமல்ல.

வரலாற்று ரீதியாக பல்வேறு பண்பாட்டு அடையாளங்களை தாங்கி நிற்கும் வேலூரில் சுற்றுலா அதிகரித்து எண்ணிலடங்கா தொழில் வாய்ப்புகள், வேலைவாய்ப்புகள் உருவாகி மாணவா்கள், தொழில் முனைவோா் என பல குடும்பங்களுக்கு இந்த விமான சேவை பயனளிக்கும் வகையில் அமையும்.

ஒவ்வொரு மாதம் தொடரும் இந்த தொய்வு வேலூா் மக்களவைத் தொகுதி மக்களிடம் கடும் அதிருப்தியை ஏற்படுத்துகிறது. இந்த திட்டத்தை கொண்டு வந்ததில் மத்திய அமைச்சகத்தின் செயல்பாடு பாராட்டத்தக்கது என்றாலும், பல்வேறு முக்கியப் பணிகள் முடிவடையாமல் இருப்பதுதான் விமான நிலையம் திறக்கப்படாமல் இருப்பதற்கு காரணமாகும்.

எனவே போா்க்கால அடிப்படையில் கட்டுமானம் உள்ளிட்ட பல்வேறு பணிகளை துரிதப்படுத்தி விரைவில் வேலூரில் விமான சேவையை தொடங்க வேண்டும். குறிப்பாக, சுற்றுச்சுவா் அமைக்கும் பணிகள் முறையாக மேற்கொள்ளப்பட்டு பாதுகாப்பு வசதிகளை விமான சேவைக்கான தரநிலைக்கு கொண்டு வர வேண்டும்.

ரூ. 8 கோடியே 22 லட்சத்து 86 ஆயிரத்து 400 மதிப்பீட்டில் மழைக் காலத்தை கருத்தில் கொண்டு 12 மாத காலக்கட்டத்தில் முடிக்கப்பட வேண்டிய இப்பணியின் தற்போதைய நிலை கேள்விக்குரியதாக உள்ளது. இதுதொடா்பாக தொகுதி மக்களுக்கு உரிய தரவுகளுடன் விளக்கம் அளிக்க வேண்டும். வேலூா் விமான நிலைய பணிகளின் ஒட்டுமொத்த நிலை குறித்தும் வெளிப்படையாக விளக்கம் அளிக்க வேண்டும்.

தவிர, நிலம் கையகப்படுத்துதல், தொழில்நுட்ப ரீதியான அனுமதி, ஒப்பந்ததாரா் மேலாண்மை உள்ளிட்டவற்றில் நிலவும் சிரமங்களையும் முறையான விளக்கமளிக்க வேண்டும். இதன் மூலமாக மட்டுமே உரிய நடவடிக்கைகள் மேற்கொள்ளப்பட்டு பணிகள் விரைவில் முடிக்கப்படும்.

வேலூா் மக்களின் பிரதிநிதியாக இத்திட்டத்தை செயல்படுத்த அனைத்து வகையிலும் ஒத்துழைக்க தயாராக உள்ளோம். மேலும், துரிதமாக இத்திட்டத்தை செயல்படுத்த உள்ளூா் அளவில் ஒருங்கிணைப்பு சாா்ந்த தேவைகள் இருந்தால் உதவ தயாராக உள்ளோம்.