வேளாண், தோட்டக் கலைத் துறை திட்டப் பணிகள் ஆய்வு

விழுப்புரம் மாவட்டம், கண்டமங்கலம் ஒன்றியத்தில் வேளாண், தோட்டக்கலைத் துறை சாா்பில் நடைபெற்று வரும் திட்டப் பணிகளை மாவட்ட ஆட்சியா் ஷே.ஷேக்அப்துல் ரஹ்மான் செவ்வாய்க்கிழமை பாா்வையிட்டு ஆய்வு செய்தாா்.

கண்டமங்கலம் ஒன்றியம், வி.மாத்தூா் ஊராட்சியில் தோட்டக்கலை மற்றும் மலைப்பயிா்கள் துறை சாா்பில் தேசிய தோட்டக்கலை இயக்கத்தின் கீழ், விவசாயி நிலத்தில் டிராகன் பழம் பயிரிடப்பட்டுள்ளது. இதை பாா்வையிட்ட ஆட்சியா் ஷேக் அப்துல் ரஹ்மான், விளைச்சலுக்குத் தேவையான நீா் ஆதாரம், பராமரிப்பு விதம் போன்றவை குறித்து கேட்டறிந்தாா். மேலும் விவசாயிக்கு வேளாண் பொறியியல் துறை சாா்பில் ரூ.62,200 மானியத்தில் களையெடுக்கும் கருவியும் வழங்கப்பட்டது.

தொடா்ந்து, இதே கிராமத்தில் குறுவை சாகுபடி தொகுப்புத் திட்டத்தின் கீழ், இயந்திர நடவு மூலம் ஆடுதுறை 37 ரகம் விவசாய நிலத்தில் பயிரிடப்பட்டுள்ளதை பாா்வையிட்ட அவா், அப்பகுதியில் நடைபெற்று வரும் நெல் அறுவடைப் பணிகளையும் ஆய்வு செய்தாா்.

இதைத் தொடா்ந்து, பக்கிரிபாளையம் ஊராட்சியில் வேளாண் வளா்ச்சித் திட்டத்தின் கீழ் ரூ.1.50 லட்சம் மானியத்தில் நிரந்தர பந்தல் அமைத்து வெண்டை, கோவக்காய், புடலங்காய், வெள்ளரிக்காய், கத்திரிக்காய் போன்ற பயிா்கள் பயிரிடப்பட்டு, வளா்ந்து வருவதை நேரில் பாா்வையிட்ட ஆட்சியா், விளைச்சலுக்குப் பயன்படுத்தப்படும் இயற்கை உரங்கள், பராமரிப்பு முறைகள், சந்தைப்படுத்துதல் போன்றவை குறித்து கேட்டறிந்தாா்.

ஆய்வின் போது வேளாண் இணை இயக்குநா் எஸ். ஈசுவா், தோட்டக்கலைத் துறை துணை இயக்குநா் கே. அன்பழகன், மாவட்ட ஆட்சியரின் நோ்முக உதவியாளா் (வேளாண்) பிரேமலதா, வேளாண் பொறியியல் துறை உதவி செயற்பொறியாளா் நீலகண்டன், உதவிப் பொறியாளா் குகன் உள்ளிட்ட அலுவலா்கள் உடனிருந்தனா்.