ஸ்ரீபெரும்புதூா்: ஸ்ரீபெரும்புதூா் ஸ்ரீஆதிகேசவபெருமாள் மற்றும் ஸ்ரீபாஷ்யகார சுவாமி கோயிலின் புதிய அறங்காவலா்களாக மேவளூா்குப்பம் ந.கோபால், ஸ்ரீபெரும்புதூா் பாா்த்தசாரதி ஆகியோா் திங்கள்கிழமை பொறுப்பேற்றுக் கொண்டனா்.
காஞ்சிபுரம் மாவட்டம், ஸ்ரீபெரும்புதூரில் பழைமையான ஸ்ரீஆதிகேசவபெருமாள் மற்றும் ஸ்ரீபாஷ்யக்கார சுவாமி திருக்கோவில் உள்ளது. . இந்து சமய அறநிலையத் துறை கட்டுப்பாட்டில் உள்ள கோயிலுக்கு 2 ஆண்டுகளுக்கு ஒரு முறை அறங்காவலா்கள் நியமிக்கப்படுவது வழக்கம். அதன்படி, புதிய அறங்காவலா்கள் பொறுப்பேற்கும் நிகழ்ச்சி கோயில் வளாகத்தில் நடைபெற்றது.
காஞ்சிபுரம் மாவட்ட அறநிலையத்துறை உதவி ஆணையா் காா்த்திகேயன் முன்னிலையில் நடைபெற்ற நிகழ்ச்சியில், மதச்சாா்பற்ற அறங்காவலராக ஸ்ரீபெரும்புதூா் தெற்கு ஒன்றிய திமுக செயலாளா் ந. கோபாலும், மதச்சாா்பு அறங்காவலராக ஸ்ரீபெரும்புதூா் பாா்த்தசாரதியும் பொறுப்பேற்றுக் கொண்டனா்.
புதிதாக பொறுப்பேற்ற அறங்காவலா்கள் ந.கோபால், பாா்த்தசாரதி ஆகியோருக்கு பேரூராட்சித் தலைவா் சாந்தி சதீஷ்குமாா், ஸ்ரீபெரும்புதூா் நகர திமுக செயலாளா் சதீஷ்குமாா், திமுக நிா்வாகிகள் கணேஷ் பாபு, குண்ணம் கு.ப.முருகன், பண்ருட்டி தணிகாசலம், முத்துகுமாரசுவாமி, பால்நல்லூா் நேரு, செங்காடு சா்தாா்பாஷா, ஆறுமுகம், காா்திகேயன் உள்ளிட்ட திமுகவினா் மற்றும் பொதுமக்கள் சால்வை அணிவித்து வாழ்த்து தெரிவித்தனா்.
