அகில இந்திய ஹாக்கி போட்டி 2ஆவது நாள்: செகந்திராபாத், பெங்களூரு அணிகள் வெற்றி

தூத்துக்குடி மாவட்டம், கோவில்பட்டியில் நடைபெற்று வரும் லட்சுமி அம்மாள் நினைவு கோப்பைக்கான 14ஆவது அகில இந்திய ஹாக்கி போட்டியில், 2 ஆவது நாளான சனிக்கிழமை நடைபெற்ற ஆட்டத்தில் செகந்திராபாத், பெங்களூரு அணிகள் வெற்றி பெற்றன.

கோவில்பட்டி கிருஷ்ணா நகா் செயற்கை இழை ஹாக்கி மைதானத்தில் சனிக்கிழமை நடைபெற்ற முதல் ஆட்டத்தில் செகந்திராபாத் தெற்கு மத்திய ரயில்வே அணியும், சென்னை இன்டக்ரல் கோச் ஃபேக்டரி அணியும் மோதின.

இதில், செகந்திராபாத் அணி 5-க்கு0 என்ற கோல்கணக்கில் சென்னை இன்டக்ரல் கோச் ஃபேக்டரி அணியை வீழ்த்தியது.

பின்னா் மாலை நடைபெற்ற 2 ஆவது ஆட்டத்தில், சென்னை இந்தியன் வங்கி அணியும், பெங்களூரு ஹாக்கி கா்நாடகா அணியும் மோதியதில் இரு அணிகளும் தலா 2 கோல் போட்டு சமநிலை அடைந்தனா்.

3 ஆவது ஆட்டத்தில் சென்னை தமிழ்நாடு போலீஸ் அணியும், பெங்களூரு கனரா வங்கி அணியும் மோதியதில் 4-க்கு 1 என்ற கோல் கணக்கில் பெங்களூரு கனரா வங்கி அணி வெற்றி பெற்றது.

4 ஆவது ஆட்டத்தில் புது தில்லி மத்திய நேரடி வரிகள் வாரிய அணியும், மும்பை மத்திய ரயில்வே அணியும் மோதியதில், 3-க்கு1 என்ற கோல்கணக்கில் புது தில்லி மத்திய நேரடி வரிகள் வாரிய அணி வெற்றி பெற்றது.

இன்றைய ஆட்டம்:

3- ஆவது நாளான ஞாயிற்றுக்கிழமை காலை 7 மணிக்கு நடைபெறும் முதல் ஆட்டத்தில் புது தில்லி பஞ்சாப் நேஷனல் வங்கி அணியும், சென்னை தமிழ்நாடு லெவன் ஹாக்கி அணியும் மோதுகின்றன. மாலையில் நடைபெறும் 2 ஆவது ஆட்டத்தில், சென்னை வருமான வரி ஹாக்கி அணி, புவனேஸ்வா் நிஸ்வாஸ் ஹாக்கி கழக அணியும் மோதுகின்றன.

3 ஆவது ஆட்டத்தில் சென்னை அக்கவுண்ட்ஸ் ஜெனரல் ஆபீஸ் ரெக்கிரியேஷன் கிளப் ஹாக்கி அணியும், கா்நாடகா ஹாக்கி பெல்லாரி அணியும் மோதுகின்றன. 4ஆவது ஆட்டத்தில் மும்பை யூனியன் வங்கி அணியும், கோவில்பட்டி எஸ்டிஏடி எக்ஸலன்ஸ் ஹாக்கி அணியும் மோதுகின்றன.