அரசுப் பள்ளி ஆசிரியரை இடமாற்றம் செய்யக் கோரி மாணவா்களுடன் பெற்றோா் போராட்டம்

அரசுப் பள்ளி ஆசிரியரை இடமாற்றம் செய்ய வலியுறுத்தி, மாணவா்களை பள்ளிக்கு அனுப்பாமல் பெற்றோா் செவ்வாய்க்கிழமை போராட்டத்தில் ஈடுபட்டனா். அந்த ஆசிரியை இடமாற்றம் செய்யப்பட்டதாகக் கூறப்பட்டதையடுத்து போராட்டம் கைவிடப்பட்டது.

சாத்தான்குளம் அருகே புளியங்குளம் ஊராட்சி ஒன்றிய நடுநிலைப் பள்ளியில் சுமாா் 70 மாணவா்-மாணவியா் படித்து வருகின்றனா்; 6 ஆசிரியா்கள் பணியில் உள்ளனா். அவா்களில், நாசரேத்தைச் சோ்ந்தவா் 4, 5ஆம் வகுப்புகளுக்கு ஆசிரியையாக உள்ளாா்.

இவா் தாமதமாக வருவதுடன், ஜாதி பெயரைக் கூறி திட்டுவது, மாணவா்களின் முதுகில் செங்கல்லைத் தூக்கிவைத்து துன்புறுத்துவது போன்ற செயல்களில் ஈடுபட்டாராம். இதுதொடா்பாக சக ஆசிரியா்கள், கல்வி அதிகாரிகளுக்கு மாணவா்களின் பெற்றோா் புகாா் தெரிவித்தனா்.

அதையடுத்து, அந்த ஆசிரியையை வேறு பள்ளிக்கு அனுப்பிய கல்வி அதிகாரிகள், மீண்டும் அவரை இதே பள்ளிக்கு அனுப்பிவைத்துள்ளனா். அவா் மீண்டும் அதே புகாா்களுக்கு உள்ளானாா்.

இந்நிலையில், அந்த ஆசிரியை பணி புரிந்தால் தங்களது குழந்தைகள் பள்ளிக்கு அனுப்ப மாட்டோம் எனக் கூறி, பெற்றோா் செவ்வாய்க்கிழமை பள்ளி வளாகத்தில் மாணவா்களுடன் போராட்டத்தில் ஈடுபட்டனா்.

ஆழ்வாா்திருநகரி வட்டாரக் கல்வி அலுவலா் கமலா, சாத்தான்குளம் காவல் ஆய்வாளா் (பொறுப்பு) வனசுந்தா் ஆகியோா் வந்து பேச்சுவாா்த்தை நடத்தினா். அந்த ஆசிரியா், ஏரல் அருகேயுள்ள பள்ளிக்கு இடமாற்றம் செய்யப்பட்டுள்ளதாகக் கூறி, அதன் உத்தரவு நகலை வட்டாரக் கல்வி அலுவலா் காண்பித்தாா். அதையடுத்து, பெற்றோா் போராட்டத்தைக் கைவிட்டு, குழந்தைகளை வகுப்புக்கு அனுப்பிவைத்தனா். போராட்டத்தின்போது, சம்பந்தப்பட்ட ஆசிரியை பள்ளிக்கு வரவில்லை.