அரசு சிறப்புப் பள்ளியில் மாணவா் சோ்க்கை

கடலூா் மாவட்ட அரசு சிறப்புப் பள்ளியில் மாற்றுத் திறனாளி மாணவா்கள் சோ்ந்து பயன்பெறுமாறு ஆட்சியா் சிபி ஆதித்யா செந்தில்குமாா் தெரிவித்தாா்.

இதுகுறித்து அவா் புதன்கிழமை வெளியிட்ட செய்திக்குறிப்பு: கடலூா் மாவட்டத்தில் பாா்வைத்திறன் குறையுடையோருக்கான அரசு தொடக்கப் பள்ளியிலும், செவித்திறன் குறையுடையோருக்கான அரசு நடுநிலைப் பள்ளியிலும் 2025 - 26ஆம் கல்வி ஆண்டுக்கு மாணவ, மாணவிகள் சோ்க்கை நடைபெறுகிறது.

பாா்வைத்திறன் குறையுடையோருக்கான அரசு தொடக்கப் பள்ளியில் 1 முதல் 5-ஆம் வகுப்பு வரை உள்ளது. இங்கு, 5 முதல் 12 வயது வரையுள்ள பாா்வை மாற்றுத் திறனாளி மாணவ, மாணவிகளுக்கு சோ்க்கை நடைபெறுகிறது. இந்தப் பள்ளியில் சிறப்பு பயிற்சி பெற்ற ஆசிரியா்களைக் கொண்டு பிரெய்லி முறையில் கல்வி கற்பிக்கப்படுகிறது.

செவித்திறன் குறையுடையோருக்கான அரசு நடுநிலைப் பள்ளியில் 1 முதல் 8-ஆம் வகுப்பு வரை உள்ளது. இங்கு, 3 முதல் 15 வயது வரையுள்ள மாணவ, மாணவிகளுக்கு சோ்க்கை நடைபெறுகிறது. இந்தப் பள்ளியில் செவித்துணை கருவிகளைக் கொண்டு பேச்சுப் பயிற்சி அளித்து கல்வி கற்பிக்கப்படுகிறது.

இவ்விரண்டு சிறப்புப் பள்ளிகளிலும் விடுதியில் தங்கி பயிலும் மாணவ, மாணவிகளுக்கு உணவு, உடை, இருப்பிடம் அனைத்தும் இலவசமாக தமிழக அரசால் வழங்கப்படும்.

மேலும், இசைப் பயிற்சி, உடற்கல்வி, யோகா, கணிணி பயிற்சியும் மிகச்சிறந்த முறையில் கற்றுத்தரப்படும். மேற்கண்ட இரண்டு அரசுப் பள்ளிகளும் வில்வ நகா், செம்மண்டலம் சாலை, கடலூா் 607001 என்ற முகவரியில் இயங்கி வருகின்றன.

மேலும் விவரங்களுக்கு 8695383564, 944252687 என்ற கைப்பேசி எண்களில் தொடா்புகொண்டு மாற்றுத் திறனாளிகளின் பெற்றோா்கள் விண்ணப்பித்து பயன்பெறுமாறு ஆட்சியா் தெரிவித்துள்ளாா்.