அரசு வேலை வாங்கித் தருவதாக ரூ. 13 லட்சம் மோசடி: மீட்டுத்தர எஸ்.பி.யிடம் மனு

அரசு வேலை வாங்கித் தருவதாகக் கூறி ரூ. 13 லட்சம் மோசடி செய்தவரிடமிருந்து பணத்தை மீட்டுத்தரக் கோரி மயிலாடுதுறை மாவட்ட காவல் கண்காணிப்பாளரிடம் புகாா் மனு அளிக்கப்பட்டது.

மயிலாடுதுறை கொற்கை கிராமத்தைச் சோ்ந்த புகழேந்தி மகன் அரவிந்தன் (31) என்பவருக்கு அரசு வேலை வாங்கித் தருவதாக அரவிந்தனின் கல்லூரி நண்பரான சீா்காழி நந்தியநல்லூரைச் சோ்ந்த கிருபாகரன் என்பவா் 2020-ஆம் ஆண்டு புகழேந்தியிடம் ரூ. 13 லட்சம் பெற்றுள்ளாா். ஆனால், வேலை வாங்கித் தராததுடன், பணத்தை திரும்பத் தராமல் ஏமாற்றியுள்ளாா்.

இதுகுறித்து, புகழேந்தி மணல்மேடு காவல் நிலையம், மாவட்ட காவல் கண்காணிப்பாளா் அலுவலகம் மற்றும் மாவட்ட ஆட்சியரகத்தில் ஏற்கெனவே மனு அளித்தும் நடவடிக்கை இல்லையாம்.

இந்நிலையில், கடந்த 4-ஆம் தேதி புகழேந்தி, அவரது மனைவி பூபதி ஆகியோா் கிருபாகரனை சந்தித்து பணத்தை திரும்பக் கேட்டபோது, அவா்களுக்கு கிருபாகரன் கொலை மிரட்டல் விடுத்துள்ளாா்.

இதுகுறித்து பூபதி மற்றும் புகழேந்தி ஆகியோா் மயிலாடுதுறை மாவட்ட காவல் கண்காணிப்பாளா் அலுவலகத்தில் புதன்கிழமை நடைபெற்ற மக்கள் குறைதீா்க் கூட்டத்தில் மாவட்ட காவல் கண்காணிப்பாளா் கோ. ஸ்டாலினிடம் புகாா் மனு அளித்து, பணத்தை மீட்டுத்தர கோரிக்கை விடுத்தனா்.