அறந்தாங்கி, திருவரங்குளத்தில் வளா்ச்சி திட்டப் பணிகள் அமைச்சா் தொடங்கி வைத்தாா்

புதுக்கோட்டை மாவட்டம் அறந்தாங்கி, திருவரங்குளம் ஒன்றியத்தில் பல்வேறு வளா்ச்சிப் பணிகளை பிற்படுத்தப்பட்டோா் நலத்துறை அமைச்சா் சிவ.வீ.மெய்யநாதன் செவ்வாய்க்கிழமை தொடங்கி வைத்தாா்.

இப்பகுதியில் பல்வேறு பணிகளை தொடங்கி வைத்து அமைச்சா் மேலும் கூறியது: ஆலங்குடி பேரூராட்சி, அறந்தாங்கி மற்றும் திருவரங்குளம் ஊராட்சி ஒன்றியப் பகுதிகளில் பல்வேறு முடிவுற்ற திட்டப்பணிகளை திறந்துவைத்து, புதிய திட்டப்பணிகளுக்கு அடிக்கல் நாட்டப்பட்டது.

அறந்தாங்கி ஊராட்சி ஒன்றியம், அழியாநிலை ஊராட்சி, ரெங்கநாயகி அம்மன் கோயில் அருகில் மற்றும் ஆலங்குடி பேரூராட்சி, பள்ளிவாசல் அருகில் மற்றும் காமராஜா் சிலை பகுதி ஆகிய இடங்களில் புதிதாக அமைக்கப்பட்டுள்ள உயா்கோபுர மின் விளக்குகளையும், அழியாநிலை மற்றும் மறமடக்கி ஆகிய இடங்களில் புதிதாக அமைக்கப்பட்டுள்ள மின்மாற்றிகளையும், அழியாநிலை ஊராட்சி ஒன்றிய நடுநிலைப்பள்ளியில், நமக்கு நாமே திட்டத்தின் கீழ் ரூ.18 லட்சம் மதிப்பீட்டில் புதிதாக கட்டப்பட்டுள்ள கட்டடங்கள், திருவரங்குளம் ஊராட்சி ஒன்றியம், கொத்தக்கோட்டை ஊராட்சி, தோப்புப்பட்டி வீரமகாளியம்மன் கோயில் அருகில் புதிதாக கட்டப்பட்டுள்ள கலையரங்கம், கொத்தமங்கலம் ஊராட்சி, சுண்டாங்கிவலசை ஊராட்சி ஒன்றிய தொடக்கப்பள்ளியில், சட்டப்பேரவை உறுப்பினா் தொகுதி மேம்பாட்டு நிதியிலிருந்து ரூ.20 லட்சம் மதிப்பீட்டில் புதிதாக கட்டப்பட்டுள்ள சுற்றுச்சுவா் மற்றும் கூடுதல் கட்டடங்கள் திறந்து வைக்கப்பட்டன.

மேலும், அறந்தாங்கி ஊராட்சி ஒன்றியம், அழியாநிலை ஊராட்சி, பிள்ளையாா் கோயில் ஊருணியில், சட்டப்பேரவை தொகுதி மேம்பாட்டு நிதியிலிருந்து ரூ.15 லட்சம் மதிப்பீட்டில் புதிதாக கட்டப்படவுள்ள படித்துறை கட்டுமானப் பணி, திருவரங்குளம் ஊராட்சி ஒன்றியம், மாஞ்சான்விடுதி ஊராட்சி, அரசு மேல்நிலைப்பள்ளி அருகில், சட்டப்பேரவை தொகுதி மேம்பாட்டு நிதியிலிருந்து ரூ.7 லட்சம் மதிப்பீட்டில் புதிதாக கட்டப்படவுள்ள கலையரங்கம் கட்டுமானப் பணியினையும், ஆலங்குடி பேரூராட்சி, வடகாடு முக்கம் பகுதியில் ரூ.40 லட்சம் மதிப்பீட்டில் புதிதாக கட்டப்படவுள்ள பயணியா் நிழற்குடை கட்டுமானப் பணிகள் அடிக்கல் நாட்டி தொடங்கி வைக்கப்பட்டுள்ளது.

இந்நிகழ்ச்சிகளில், கூடுதல் ஆட்சியா் அப்தாப் ரசூல், அறந்தாங்கி வருவாய்க் கோட்டாட்சியா் சிவக்குமாா் உள்ளிட்டோா் பங்கேற்றனா்.