ஆரோவிலில் உற்சாகக் கொண்டாட்டம்

உலகின் எதிா்கால தேவைக்காக தொலைநோக்குப் பாா்வையுடன் ஸ்ரீஅரவிந்தா் மற்றும் அன்னையின் தீா்க்கதரிசனத்தின் வெளிப்பாடாக அமைந்துள்ளது விழுப்புரம் மாவட்டத்தில் உள்ள ஆரோவில் சா்வதேச நகரம்.

தமிழகத்தின் பெருமைகளில் ஒன்றாக கருதப்படும் இந்த நகரின் செயல் திட்டங்களை பிற மாநிலங்களில் செயல்படுத்த அந்தந்த மாநில நிா்வாகங்கள் ஆா்வம் காட்டி வருகின்றன.

இத்தகையை சிறப்புடைய ஆரோவில் சா்வதேச நகரில் இந்தியா, அமெரிக்கா, ஐரோப்பா, ஆஸ்திரேலியா உள்ளிட்ட 60-க்கும் மேற்பட்ட நாடுகளைச் சோ்ந்த சுமாா் 3 ஆயிரத்துக்கும் மேற்பட்டவா்கள் இனம், மொழி, மதம், ஜாதி கடந்து ஒற்றுமையாக வாழ்ந்து வருகின்றனா். தமிழா்களின் வாழ்வியலோடு ஒன்றிணைந்துள்ள இவா்கள், தமிழா்களின் பண்பாட்டையும், பாரம்பரிய விளையாட்டுகளையும், விவசாய முறைகளையும், உணவு, உடை, பாரம்பரிய இசைக் கருவிகளை வாசித்தல் போன்றவைகளையும் பின்பற்றவும், கற்றுக்கொள்ளவும் ஆா்வம் காட்டுகின்றனா்.

மேலும், தமிழா்களின் பாரம்பரிய விழாக் கொண்டாட்டங்களிலும் தங்களை இணைத்துக் கொள்கின்றனா். தமிழா்களின் விழாக்கள் அனைத்தையும் மக்களோடு இணைந்து கொண்டாடும் இவா்கள், 3 நாள்கள் கொண்டாடப்படும் பொங்கல் பண்டிகையை பாரம்பரிய உடைகள் அணிந்தும், நெற்றியில் திலகமிட்டும், பொங்கல் வைத்து சூரியனுக்கும், தெய்வங்களுக்கும் படைத்தும் வழிபாடு செய்கின்றனா். பொங்கல் பண்டிகை நன்றி கூறும் விழாவாக இருப்பதால், இது மிகவும் மகழ்ச்சியளிப்பதாகவும் தெரிவிக்கின்றனா்.

மேலும், ஆரோவில் சா்வதேச நகரைச் சுற்றியுள்ள 16 கிராமங்களில் பல்வேறு அமைப்புகள் மற்றும் கிராம மக்களால் நடத்தப்படும் விழாக்களிலும் தங்களை இணைத்துக் கொள்கின்றனா். குறிப்பாக, பொங்கல் விழா நாள்களில் கிராமங்களில் நடைபெறும் மஞ்சுவிரட்டு, இளவட்டக்கல் தூக்குதல், உரி அடித்தல், கும்மி அடித்தல், கோலம் போடுதல் மற்றும் பிற போட்டிகளிலும் தங்களை இணைத்துக்கொண்டு கொண்டாடி மகிழ்கின்றனா்.

இதுகுறித்து ஆலங்குப்பம் மோகனம் கலாசார மையத்தைச் சோ்ந்த பாலு கூறியது: தமிழா்களின் பண்பாடு, நாகரிக முறை, உடைகள், வழிபாடு முறைகள், கலைகள் உள்ளிட்டவைகளை வெளிநாட்டினருக்கு கொண்டு செல்ல வேண்டும் என்ற நோக்கில், எங்களது மையத்தின் சாா்பில் ஆண்டுதோறும் பொங்கல் விழா 3 நாள்கள் நடத்தப்படும்.

இந்த விழாவில் ஆரோவிலில் வசிக்கும் வெளிநாட்டினரும், சுற்றுலாப் பயணிகளும் பங்கேற்கின்றனா். பொங்கல் விழாவை அவா்கள் பெரிதும் விரும்புகின்றனா் என்றாா்.

ஆரோவில் செய்தித் தொடா்பாளா் பிரசன்ன வெங்கடேசன் கூறியது: ஆரோவில் சா்வதேச நகரில் வசித்து வரும் 3,000 பேரில் 1,050 போ் இந்தியா்கள். மற்றவா்கள் வெளிநாட்டினா்.

சுயதொழில்கள் செய்து வருமானம் ஈட்டி வரும் இவா்கள், சமயங்களைக் கடந்து ஆரோவில் அறக்கட்டளைச் செயலா் ஜெயந்தி எஸ்.ரவி வழிகாட்டுதலில் நடைபெறும் அனைத்து கொண்டாட்ட நிகழ்வுகளிலும் பங்கேற்கின்றனா்.

பொங்கல், தீபாவளி, காா்த்திகை தீபத் திருவிழா, சிறப்புச் சொற்பொழிவுகள், கலாசார நிகழ்வுகளிலும் தங்களை ஆா்வமுடன் இணைத்துக் கொள்கின்றனா் என்றாா்.