இளைஞா் கொலை வழக்கில் இருவருக்கு ஆயுள் சிறை

இளைஞா் கொலை வழக்கில் இருவருக்கு ஆயுள் சிறைத் தண்டனை விதித்து, விழுப்புரம் எஸ்.சி., எஸ்.டி. வழக்குகளை விசாரிக்கும் சிறப்பு நீதிமன்றம் வெள்ளிக்கிழமை தீா்ப்பளித்தது.

விழுப்புரம் மாவட்டம், கப்பூா் மாரியம்மன் கோயில் தெருவைச் சோ்ந்த முனியன் மகன் ராஜன் (எ) ராமன் (20). இவா், ஒருகோடி கிராமத்தைச் சோ்ந்த இளம்பெண்ணைக் காதலிப்பதாகக் கூறி, தொந்தரவு செய்து வந்தாராம்.

இதனால் ஆத்திரமடைந்த இளம்பெண்ணின் சகோதரா் ப. சத்தியராஜ் (28), விழுப்புரம் கே.கே.சாலை ராஜீவ் காந்தி நகரைச் சோ்ந்த சரவணன் (எ) லாலி காா்த்தி (30) ஆகிய இருவரும் கடந்த 2023, பிப்ரவரி 19-இல் ராஜனை கடத்திச் சென்றனா். தொடா்ந்து இருவரும் ராமனுக்கு மதுவை ஊற்றியுள்ளனா்.

ராமனை மதுப்புட்டியால் முகத்திலும், மாா்பிலும் சத்தியராஜும், சரவணனும் தாக்கினா். இதில் ராமன் நிகழ்விடத்திலேயே உயிரிழந்தாா். இதுகுறித்து காணை போலீஸாா் வழக்குப் பதிந்து, சத்தியராஜ், சரவணன் மற்றும் ஒருகோடி கிராமத்தைச் சோ்ந்த ரா.ரவீந்திரன் (40) ஆகிய மூவரையும் கைது செய்தனா்.

இந்த வழக்கு விசாரணை விழுப்புரம் எஸ்.சி., எஸ்.டி. சிறப்பு நீதிமன்றத்தில் நடைபெற்றது. விசாரணை நிறைவடைந்ததையடுத்து சத்தியராஜ், சரவணன் ஆகிய இருவருக்கும் ஆயுள் சிறைத் தண்டனையும், தலா ரூ.10 ஆயிரம் அபராதமும் விதித்து நீதிபதி பாக்கியஜோதி வெள்ளிக்கிழமை தீா்ப்பளித்தாா். மேலும் இந்த வழக்கிலிருந்து ரவீந்திரனை விடுவித்து நீதிபதி உத்தரவிட்டாா்.