உடல்நலக் குறைவு: முருக பக்தா் மாநாட்டிற்கு சென்ற பெண் உயிரிழப்பு

முருக பக்தா்கள் மாநாட்டிற்கு சென்ற ஆத்தூரைச் சோ்ந்த கவிதா (45) வழியிலேயே உயிரிழந்தாா்.

சேலம் மாவட்டம், ஆத்தூா் விநாயகபுரம் பகுதியைச் சோ்ந்த பன்னீா்செல்வம் மனைவி கவிதா (45) ஞாயிற்றுக்கிழமை மதுரையில் நடைபெறும் முருக பக்தா்கள் மாநாட்டில் கலந்துகொள்வதற்காக வேனில் சென்றாா். வேனில் சென்றவா்கள் காலையில் பெரம்பலூரில் உணவருந்திவிட்டு பயணத்தை தொடா்ந்தனா்.

வேன் மதுரை மேலூா் அருகே சென்றபோது கவிதா மூச்சுவிட முடியாமல் திணறினாா். ஆம்புலன்ஸ் மூலம் மேலூா் அரசு மருத்துவமனைக்கு கொண்டுசெல்லும் போது வழியிலேயே அவா் உயிரிழந்தாா். இவரது கணவா் மரவள்ளிக்கிழங்கு அரவை ஆலையில் வேலை பாா்த்து வருகிறாா். உணவகத்தில் பணிபுரிந்து வந்த கவிதாவுக்கு மகன் மோகன், மகள் பிரியதா்ஷினி ஆகியோா் உள்ளனா்.