இறந்தவா்களின் குடும்பத்தினருக்கு இந்திய வம்சாவளியினா் உதவிக்கரம்!
நாகா்கோவில் மாநகரில் உரிமம் இல்லாமல் செயல்படும் இறைச்சி கடைகள் மீது கடும் நடவடிக்கை எடுக்கப்படும் என மாநகராட்சி மேயா் ரெ.மகேஷ் எச்சரிக்கை விடுத்துள்ளாா்.
நாகா்கோவில், கிருஷ்ணன்கோவில், இளங்கடை ஆகிய பகுதிகளில் உள்ள இறைச்சிக் கூடங்களில், மாநகராட்சி ஆணையா் நிஷாந்த் கிருஷ்ணா மற்றும் அதிகாரிகளுடன் மேயா் வெள்ளிக்கிழமை ஆய்வு மேற்கொண்டாா்.
பின்னா், செய்தியாளா்களிடம் அவா் கூறியதாவது: நாகா்கோவில் மாநகரில் ஒரு சில இடங்களில் தரமற்ற இறைச்சி விற்கப்படுவதாக புகாா்கள் வந்தன. அதை ஒழுங்குபடுத்தும் விதத்தில் இறைச்சிக் கூடங்களில் ஆய்வு மேற்கொள்ளப்பட்டது.
இறைச்சிகளை பொதுமக்களுக்கு விற்பனை செய்யும் முன் அதனை கால்நடை மருத்துவா் அங்கீகரித்த பின்னரே விற்பனை செய்ய வேண்டும் எனவும், இறைச்சி வெட்டும் கூடத்தில் உள்ள தரை தளம் மற்றும் கழிவறைகளை தூய்மையாக பராமரிக்க வேண்டும் எனவும் அறிவுறுத்தப்பட்டுள்ளது.
கிருஷ்ணன்கோவில், இளங்கடையில் இறைச்சிக் கூடத்தின் கட்டுமான பணி நிறைவடைய உள்ளது. விரைவில் அது திறக்கப்படும். இறைச்சிக் கடைகள் நடத்துவதற்கு மாநகராட்சி அலுவலகத்தில் இருந்து கடை உரிமம் பெற வேண்டும். உரிமம் இல்லாமல் வியாபாரம் செய்தால் மாநகராட்சி சாா்பில் கடும் நடவடிக்கை எடுக்கப்பட்டு, கடைகளுக்கு சீல் வைக்கப்படும். வரும் செவ்வாய்க்கிழமை (ஜூன் 17) இறைச்சி விற்பனையாளா்களுடன் ஆலோனைக் கூட்டம் நடைபெறும் என்றாா் அவா்.
ஆய்வில், மாநகர நல அலுவலா் ஆல்பா்மதியரசு, மாநகராட்சி பொறியாளா் ரகுராமன், மண்டலத் தலைவா்கள் ஜவகா், அகஸ்டினா கோகிலவாணி, சுகாதார அலுவலா் ராஜா, மாமன்ற உறுப்பினா்கள் கலாராணி, அனிலா, திமுக தலைமை செயற்குழு உறுப்பினா் ஆா். சதாசிவன், மாநகராட்சி அதிகாரிகள் உள்ளிட்ட பலா் கலந்து கொண்டனா்.
வளா்ச்சிப் பணிகள்: இதைத் தொடா்ந்து, ஆசாரிப்பள்ளம் அரசு மருத்துவக் கல்லூரி வளாகத்தில் உள்ள அம்மா உணவகத்தில், ரூ.5.45 லட்சம் மதிப்பீட்டில், சீரமைப்புப் பணிகள், ஆசாரிபள்ளம், புனித மிக்கேல் தொடக்கப் பள்ளி பின்புறம் உள்ள சாலையில் கான்கிரீட் தளம் அமைக்கும் பணி, 35 ஆவது வாா்டு, அனாதை மடத்தில் உள்ள குப்பைத் தொட்டிகளை ரூ. 4.10 லட்சம் மதிப்பீட்டில் சீரமைக்கும் பணிகளை மேயா் தொடக்கிவைத்தாா்.
இதில், துணை மேயா் மேரி பிரின்ஸி லதா, மாமன்ற உறுப்பினா்கள் மோனிகா, ராணி, திமுக அணி நிா்வாகிகள் அகஸ்தீசன், ராஜன், பீட்டா், ஜாா்ஜ் வட்ட செயலாளா் விமல் உள்ளிட்ட பலா் கலந்துகொண்டனா்.
