உலக தண்ணீா் தினத்தையொட்டி நாளை கிராம சபைக்கூட்டம்

உலக தண்ணீா் தினத்தையொட்டி, பெரம்பலூா் மாவட்டத்தில் உள்ள 121 கிராம ஊராட்சிகளிலும் சனிக்கிழமை (மாா்ச் 29) கிராம சபைக்கூட்டம் நடைபெற உள்ளது என மாவட்ட ஆட்சியா் கிரேஸ் பச்சாவ் தெரிவித்துள்ளாா்.

இதுகுறித்து அவா் வியாழக்கிழமை வெளியிட்ட செய்திக் குறிப்பு:

உலக தண்ணீா் தினமான மாா்ச் 22-இல் நடைபெறவிருந்த கிராம சபைக்கூட்டம் நிா்வாகக் காரணங்களால் சனிக்கிழமை நடைபெறுகிறது. இக் கூட்டத்தில், கிராம சபை உறுப்பினா்கள் தவறாமல் பங்கேற்று, கிராமங்களுக்கு என்னென்ன தேவை என்பதை கேட்டறிய வேண்டும். உலக தண்ணீா் தினத்தின் கருப்பொருள், கிராம ஊராட்சி நிா்வாகம் மற்றும் பொதுநிதி செலவினம், கிராம ஊராட்சியின் தணிக்கை அறிக்கை, சுத்தமான குடிநீா் விநியோகத்தை உறுதி செய்வது குறித்து விவாதிக்க வேண்டும். மேலும், கலைஞரின் கனவு இல்ல பயனாளிகளை தோ்வு செய்தல், அனைத்து கிராம அண்ணா மறுமலா்ச்சித் திட்டம், மகாத்மா காந்தி தேசிய ஊரக வேலை உறுதித் திட்ட பணிகளை இறுதி செய்ய வேண்டும்.

இக் கூட்டத்தில் மக்களவை, சட்டப்பேரவை உறுப்பினா்கள் மற்றும் கிராம ஊராட்சி வாக்காளா்கள் பங்கேற்க வேண்டும். துறை வாரியான அலுவலா்கள் தவறாமல் பங்கேற்பதோடு, துறை தொடா்பான திட்டங்களை பொதுமக்களுக்கு விளக்கி கூறவேண்டும். இக் கூட்டத்தை கண்காணிக்க ஒவ்வொரு ஊராட்சிக்கும் பற்றாளா்கள் நியமிக்கப்பட்டுள்ளனா். எனவே, கிராம ஊராட்சிகளின் வெளிப்படையான நிா்வாகத்துக்கும், ஆக்கப்பூா்வமான ஊராட்சி நிா்வாகம் மற்றும் ஊராட்சியில் இதர பொருள்கள் குறித்து விவாதித்திடவும் அனைவரும் பங்கேற்க வேண்டும்.