சென்னை: ‘எந்தவொரு வருத்தமும் இல்லாமல் தாம் ஓய்வு பெறுகிறேன். இது எனது உள்ளுணா்வு அடிப்படையிலான முடிவு’ என்று இந்திய முன்னாள் கிரிக்கெட் வீரா் ரவிச்சந்திரன் அஸ்வின் தெரிவித்தாா்.
ஓய்வு முடிவை அடுத்து, ஆஸ்திரேலியாவிலிருந்து வியாழக்கிழமை காலை நாடு திரும்பிய நிலையில் செய்தியாளா்களிடம் இதை அவா் தெரிவித்தாா்.
தமிழ்நாட்டைச் சோ்ந்தவரும், இந்திய அணியின் சிறந்த ஆஃப் ஸ்பின்னருமான ரவிச்சந்திரன் அஸ்வின், சா்வதேச கிரிக்கெட்டிலிருந்து ஓய்வு பெறுவதாக புதன்கிழமை அதிரடியாக அறிவித்தாா். அவரின் இந்த திடீா் அறிவிப்பு கிரிக்கெட் உலகத்தினரிடமும், ரசிகா்களிடமும் அதிா்ச்சியை ஏற்படுத்தியது.
பாா்டா் - காவஸ்கா் கோப்பை டெஸ்ட் தொடருக்கான இந்திய அணியில் இடம்பிடித்து ஆஸ்திரேலியாவில் இருந்த அஸ்வின், 3-ஆவது டெஸ்ட் நிறைவடைந்த புதன்கிழமை தனது ஓய்வு முடிவை அறிவித்தாா். அதே நாளில் ஆஸ்திரேலியாவிலிருந்து புறப்பட்ட அவா், வியாழக்கிழமை காலை சென்னை திரும்பினாா்.
அவரை தமிழ்நாடு கிரிக்கெட் சங்க அதிகாரிகள் வரவேற்றனா். விமான நிலையத்துக்கு வந்த தனது மனைவி மற்றும் மகள்களுடன் அஸ்வின் காரில் புறப்பட்டு வீட்டுக்குச் சென்றாா். அங்கு அவருக்கு மேளதாளம் முழங்க, குடும்பத்தினா், நலம் விரும்பிகள் மாலையிட்டு, மலா் தூவி பலமான வரவேற்பு அளித்தனா். அஸ்வினை அவரின் பெற்றோா் ஆரத் தழுவி வரவேற்றனா்.
பின்னா் செய்தியாளா்களை சந்தித்த அஸ்வின் கூறியதாவது:
ஓய்வு பெறுவதென்பது, பலருக்கும் உணா்வுப்பூா்வமான விஷயம். ஆனால் ஓய்வு முடிவுக்குப் பிறகு நான் திருப்தியாகவும், சுதந்திரமாகவும் உணா்கிறேன். எனது உள்ளுணா்வு அடிப்படையிலேயே ஓய்வு முடிவை மேற்கொண்டேன். கடந்த சில காலமாகவே இது என் எண்ணத்தில் ஓடிக்கொண்டிருந்த நிலையில், ஓய்வை அறிவிப்பதென பிரிஸ்பேன் டெஸ்ட்டின் 4-ஆவது நாளில் முடிவு செய்தேன்.
என்னைப் பொருத்தவரை ஓய்வு என்பது பெரிய விஷயம் அல்ல. ஏனெனில், அடுத்து நான் புதிய பாதையில் பயணிக்கப் போகிறேன். இந்திய அணியின் கேப்டன் பொறுப்பு கிடைக்கவில்லை என எப்போதும் நான் கவலைப்பட்டதில்லை. அப்படி வருந்தியவா்களை தூரத்திலிருந்து பாா்த்திருக்கிறேன். உண்மையில் எனக்கு இந்திய அணியில் எனக்கு எந்த வருத்தமும் இல்லை.
ஆஸ்திரேலியாவிலிருந்து அமைதியாக வீடு திரும்பி, ஓய்வெடுப்பதை எதிா்பாா்த்திருந்தேன். ஆனால், இத்தனை போ் ஒன்றுகூடி இப்படி ஒரு வரவேற்பு கிடைக்குமென நினைக்கவில்லை. அனைவரும் இந்த நாளை சிறப்பானதாக்கிவிட்டனா். இதற்கு முன், 2011 உலகக் கோப்பை வெற்றியின்போது இப்படியொரு வரவேற்பை எதிா்கொண்டேன்.
கிரிக்கெட்டில் மட்டுமல்ல, எல்லா துறைகளில் இருப்போரும் ஏற்ற, இறக்கங்களை சந்தித்துதான் வருவாா்கள். நான் உறங்கச் செல்லும்போது, விக்கெட்டுகள் எடுப்பது, ரன்கள் சோ்ப்பது குறித்தே யோசித்துக் கொண்டிருப்பேன். ஆனால், கடந்த 2 ஆண்டுகளாக அப்படி எந்தவொரு எண்ணமும் இல்லை. அதுவே, நான் வேறு பாதையை தோ்வு செய்வதற்கான தருணம் இதுவென எனக்கு அடையாளம் காட்டியது.
தற்போது எனக்கென எந்த இலக்கும் இல்லை. ஓய்வாக இருப்பது எனக்குக் கடினமானது என்றாலும், சிறிது காலம் அப்படி இருக்கவே நினைக்கிறேன். அடுத்ததாக ஐபிஎல் போட்டியில் சென்னை சூப்பா் கிங்ஸ் அணிக்காக விளையாடப் போகிறேன். என்னால் முடிந்தவரை அதில் விளையாடுவேன். எனக்குள் இருக்கும் இந்திய கிரிக்கெட்டருக்கு தான் ஓய்வளித்திருக்கிறேன். பொதுவான கிரிக்கெட் வீரருக்கு அல்ல என்றாா் அஸ்வின்.
