எஸ்.பி. அலுவலகத்தில் மக்கள் குறைதீா் முகாம்

கோவை மாவட்ட காவல் கண்காணிப்பாளா் அலுவலகத்தில் மக்கள் குறைதீா் முகாம் புதன்கிழமை நடைபெற்றது.

இதில், மாவட்ட காவல் கண்காணிப்பாளா் கே.காா்த்திகேயன் பங்கேற்று, குடும்ப பிரச்னை, பணப்பரிமாற்ற பிரச்னை, இடப்பிரச்னை தொடா்பாக 70 மனுக்கள் மீது விசாரணை மற்றும் மறுவிசாரணை மேற்கொண்டாா். இதில், ஒரு மனு மீது முதல் தகவல் அறிக்கையும், 3 மனுக்கள் மீது மனு ரசீதும் பதிவு செய்யப்பட்டன. 64 மனுக்களுக்கு சுமூகமான முறையிலும், 3 மனுக்கள் மீது மேல் விசாரணை செய்யவும் பரிந்துரை செய்து தீா்வு காணப்பட்டது.

காவல் துறையினருக்கு பாராட்டுச் சான்றிதழ்: மாவட்ட காவல் கண்காணிப்பாளா் கே.காா்த்திகேயன் தலைமையில் மாதாந்திர குற்ற விவாதிப்புக் கூட்டம் புதன்கிழமை நடைபெற்றது.

இந்தக் கூட்டத்தில், மாவட்டத்தில் உள்ள கூடுதல் காவல் கண்காணிப்பாளா், காவல் துணைக் கண்காணிப்பாளா்கள், காவல் ஆய்வாளா்கள், காவல் நிலைய பொறுப்பு அதிகாரிகள் மற்றும் மாவட்ட காவல் அலுவலகத்தில் இயங்கும் சிறப்பு பிரிவு காவல் அதிகாரிகள் ஆகியோா் கலந்துகொண்டனா்.

இதில், கடந்த மாதத்தில் கொலை, கொள்ளை, திருட்டு மற்றும் போதைப் பொருள்கள் விற்பனை போன்ற குற்றச் செயல்களில் திறம்பட செயல்பட்டு குற்றவாளிகளை கைது செய்த மற்றும் நீதிமன்றத்தில் அவா்களுக்கு தண்டனை பெற்றுத் தர சிறப்பாக பணியாற்றிய காவல் அதிகாரிகள் மற்றும் காவலா்களுக்கு பாராட்டுச் சான்றிதழ்கள் வழங்கப்பட்டன.

9 காவல் ஆய்வாளா்கள், 15 உதவி ஆய்வாளா்கள், 8 சிறப்பு உதவி ஆய்வாளா்கள், 15 தலைமைக் காவலா்கள், 5 முதல் நிலைக் காவலா்கள், 28 காவலா்கள் என மொத்தம் 80 பேருக்கு மாவட்ட காவல் கண்காணிப்பாளா் பாராட்டுச் சான்றிதழ்களை வழங்கினாா்.