ஓய்வுபெற்ற ஆசிரியையிடம் ரூ.10 ஆயிரம் லஞ்சம்: கருவூல அலுவலா் கைது

பாலக்கோடு அருகே விருப்ப ஓய்வு பெற்ற ஆசிரியையிடம் ஓய்வூதிய பலன்களைப் பெற்றுத் தருவதற்கு ரூ.10 ஆயிரம் லஞ்சம் வாங்கிய கூடுதல் சாா்நிலைக் கருவூல அலுவலரை லஞ்ச ஒழிப்புத் துறையினா் செவ்வாய்க்கிழமை கைது செய்தனா்.

தருமபுரி மாவட்டம், பாலக்கோடு அருகே உள்ள அல்ராஜு கவுண்டா் தெருவைச் சோ்ந்தவா் ஆசிரியை கவிதா (50). இவா் சிக்காா்தனஅள்ளி அரசு நடுநிலைப் பள்ளியில் ஆசிரியராகப் பணியாற்றி கடந்த இரண்டு ஆண்டுகளுக்கு முன்பு உடல்நலக் குறைவு காரணமாக விருப்ப ஓய்வு பெற்றாா்.

இந்த நிலையில் ஓய்வூதிய பணப் பலன் ரூ. 29.50 லட்சத்தை பெறுவதற்காக கல்வித் துறையில் அனுமதி கோரியுள்ளாா். அனுமதி அளிக்கப்பட்ட நிலையில், பாலக்கோடு சாா்நிலைக் கருவூலத்தில் அதற்கான பணியினை மேற்கொண்டாா். பாலக்கோடு சாா்நிலைக் கருவூலத்தில் கூடுதல் சாா்நிலை கருவூல அலுவலராகப் பணியாற்றி வந்த பாப்பாரப்பட்டி அருகே திருமல்வாடி பகுதியைச் சோ்ந்த ராமச்சந்திரன் (42) பணப் பலன்களை பெற வேண்டுமெனில் ரூ.10 ஆயிரம் லஞ்சம் தரவேண்டும் என கேட்டுள்ளாா்.

இதுகுறித்து கவிதா தருமபுரி ஊழல் தடுப்பு மற்றும் கண்காணிப்புப் பிரிவு காவல் துணை கண்காணிப்பாளா் நாகராஜிடம் புகாா் அளித்தாா். இந்தப் புகாரின் பேரில் லஞ்ச ஒழிப்புத் துறையினா் அறிவுறுத்தலின்படி ரசாயனம் தடவிய ரூபாய் நோட்டுகளை கவிதா, கருவூல அலுவலா் ராமச்சந்திரனிடம் வழங்கினாா். அப்போது அலுவலக பகுதியில் மறைந்திருந்த லஞ்ச ஒழிப்புத் துறை துணை கண்காணிப்பாளா் நாகராஜன், ஆய்வாளா் பெருமாள் ஆகியோா் ராமச்சந்திரனை கைது செய்து விசாரணைக்காக அழைத்துச் சென்றனா்.