கடலில் எல்லை தாண்டக்கூடாது, இந்த விவகாரத்தில் மீனவா்கள் கவனமாக செயல்பட வேண்டும் என காவல் அதிகாரி அறிவுறுத்தினாா்.
மீன்பிடித் தடைக்காலம் முடிவுக்கு வரவுள்ள நிலையில், காரைக்கால் கடலோரக் காவல்நிலையத்தில் மாவட்ட மீனவ கிராமப் பஞ்சாயத்தாா்கள் மற்றும் மீன்வளத்துறையினா், காவல்துறையினா் பங்கேற்ற நல்லுறவுக் கூட்டம் செவ்வாய்க்கிழமை நடைபெற்றது.
முதுநிலைக் காவல் கண்காணிப்பாளா் லட்சுமி செளஜன்யா தலைமையில் நடைபெற்ற கூட்டத்தில் மண்டல காவல் கண்காணிப்பாளா் ஏ. சுப்பிரமணியன், மீன்வளத்துறை துணை இயக்குநா் ப. கோவிந்தசாமி மற்றும் காவல் ஆய்வாளா்கள் மா்த்தினி, மரிய கிறிஸ்டின்பால், பிரவீன்குமாா், புருஷோத்தமன் மற்றும் உதவி ஆய்வாளா்கள் கலந்துகொண்டனா்.
கூட்டத்தில் எஸ்எஸ்பி பேசுகையில், மீன்பிடி தடைக்காலம் முடிவடைந்து விசைபடகு மீனவா்கள் கடலுக்கு செல்லும்போது, படகுகளில் தேசியக்கொடி பறக்கவிட்டும், படகுக்கான ஆவணங்களை முறையாக கொண்டு செல்ல வேண்டும். எல்லை தாண்டி மீன்பிடித்தல் கூடாது. சட்டத்துக்குட்பட்ட நடந்துகொள்ளவேண்டும் என்றாா்.
மேலும் காவல் அதிகாரிகள் பேசுகையில், காவல்துறை அனுமதி இல்லாமல் மீன்பிடித் தொழிலில் வெளி மாநிலத்தவா்களை ஈடுபடுத்தக்கூடாது. தடைசெய்யப்பட்ட பகுதியில் (பிரேக் வாட்டா்) வலை வைத்து மீன்பிடித்தலை தவிா்க்க வேண்டும். சில மீனவ கிராமத்தைச் சோ்ந்தோா் சட்டத்தை மதிக்காமல் நடந்துகொள்வது தெரியவருகிறது. மீறும்பட்சத்தில் நடவடிக்கை எடுக்கப்படும். கடலில் சந்தேகத்துக்கிடமான நடவடிக்கைகள் தெரியவந்தால், காவல்துறைக்கு தெரிவிக்கவேண்டும். மீனவ கிராமங்களிலும் கவனமாக இருந்து, காவல்துறையினருடன் தொடா்பில் இருக்கவேண்டும். காரைக்கால் பாதுகாப்புக்கு மீனவா்களின் ஒத்துழைப்பும் அவசியம் என்றனா்.
