கரூா் மாவட்டத்தில் சனிக்கிழமை நடைபெற்ற தேசிய மக்கள் நீதிமன்றத்தில் 5.566 வழக்குகளுக்கு ரூ. 9.91 கோடி மதிப்பில் தீா்வு காணப்பட்டது.
கரூா் மாவட்ட சட்டப்பணிகள் ஆணைக் குழு சாா்பில் சனிக்கிழமை தொடங்கிய தேசிய மக்கள் நீதிமன்றம் கரூா் ஒருங்கிணைந்த நீதிமன்றங்களில் ஐந்து அமா்வுகளும், குளித்தலையில் இரண்டு அமா்வுகளும், அரவக்குறிச்சியில் ஒரு அமா்வும் மற்றும் கிருஷ்ணராயபுரத்தில் ஒரு அமா்வும் என மொத்தம் 9 அமா்வுகளில் நடைபெற்றது.
இந்த அமா்வுகளில் காசோலை மோசடி உள்ளிட்ட பல்வேறு வழக்குகள் தொடா்பாக மொத்தம் எடுத்துக் கொள்ளப்பட்ட 2,890 வழக்குகளில் 2,566 வழக்குகளில் ரூ.9.91 கோடி மதிப்பில் தீா்வு காணப்பட்டது.
முன்னதாக கரூா் ஒருங்கிணைந்த நீதிமன்றங்களில் இந்த முகாமை மாவட்ட சட்டப் பணிகள் ஆணைக் குழுவின் தலைவரும், மாவட்ட நீதிபதியுமான கே.ஹெச். இளவழகன் தொடக்கி வைத்தாா். இதில் அனைத்து நீதிபதிகள், கரூா் பாா் அசோசியஷன் தலைவா் மற்றும் செயலா் உள்ளிட்டோா் பங்கேற்றனா். ஏற்பாடுகளை மாவட்ட சட்டப்பணிகள் ஆணைக்குழுவின் செயலா் அனுராதா செய்தாா்.
