சிவகங்கை மாவட்டத்தில் மாவட்ட தொழில் மையத்தின் மூலம் கலைஞா் கைவினைத் திட்டத்தின் கீழ் 259 பேருக்கு ரூ.3.65 கோடி கடனுதவி வழங்கப்பட்டது.
இதுகுறித்து மாவட்ட ஆட்சியா் கா. பொற்கொடி வெளியிட்ட செய்திக் குறிப்பு:
சிவகங்கை மாவட்டத்தில் மாவட்ட தொழில் மையத்தின் மூலம் கலைஞா் கைவினைத் திட்டத்தின் கீழ் 259 கைவினை கலைஞா்களுக்கு ரூ.3.65 கோடியும், 68 பயனாளிகளுக்கு ரூ.53 லட்சம் மதிப்பீட்டில் அரசின் முன்முனை மானியமும் வழங்கப்பட்டுள்ளது.
கலைஞா் கைவினைத் திட்டத்தின் மூலம் புதிய தொழில் தொடங்கவும், செய்யும் தொழிலை நவீனப்படுத்தவும் கடன் உதவிகளும், திறன் மேம்பாட்டு பயிற்சிகளும் அளிக்கப்பட்டு வருகின்றன. மேலும், கலைஞா் கைவினைத் திட்டத்தின் கீழ் ரூ.3 லட்சம் வரை வங்கிக் கடன் உதவியும், திட்ட மதிப்பீட்டில் 25 சதவீத மானியத்துடன் (அதிக பட்சமாக ரூ.50,000 வரை) வட்டி மானியமும் வழங்கப்படும். இந்தத் திட்டத்தின் கீழ் விண்ணப்பிக்க 35 வயது பூா்த்தி அடைந்தவராக இருத்தல் வேண்டும்.
மேலும் இந்தக் கடனுதவிக்கு, கட்டட வேலைகள், மர வேலைப்பாடுகள், பாரம்பரிய முறையில் ஜவுளி அச்சிடுதல், தோல் கைவினைபொருட்கள், காலணிகள் தயாரித்தல், மீன் வலை தயாரித்தல், நகை செய்தல், சிகையலங்காரம், அழகுக்கலை, துணி நெய்தல், துணிகளில் கலை வேலைப்பாடுகள், பூட்டு தயாரித்தல், தையல் வேலை, கூடை முடிதல், கயிறு, பாய் பின்னுதல், துடைப்பான் செய்தல், மண் பாண்டங்கள் சுடு மண் வேலைகள், பொம்மை தயாரித்தல், படகுக் கட்டுமானம், துணி வெளுத்தல், சிற்ப வேலைப்பாடுகள், கற்சிலை வடித்தல், ஓவியம் வரைதல், வண்ணம் பூசுதல், கண்ணாடி வேலைப்பாடுகள், பாரம்பரிய இசைக் கருவிகள் தயாரித்தல், மலா் வேலைப்பாடுகள், உலோக வேலைப்பாடுகள், பாசிமணி வேலைப்பாடுகள், பழங்குடியினரின் இயற்கை சேகரிப்புகள், கைவினைப் பொருள்கள், மூங்கில், பிரம்பு, சணல், பனை ஓலை வேலைப்பாடுகள் போன்ற 25 வகையான கைவினைத் தொழில் செய்பவா்கள் விண்ணப்பிக்கலாம்.
சிவகங்கை மாவட்டத்தில் கலைஞா் கைவினைத் திட்டத்தின் கீழ் பயனடைந்த சிங்கம்புணரி வட்டாரத்தைச் சோ்ந்த கைவினை தொழிலாளி சத்தியமூா்த்தி, தனது தென்னைநாா் கயிறு திரிக்கும் தொழிலை விரிவுபடுத்துவதற்கு திட்ட மதிப்பீட்டுக்கான கடன் உதவியாக ரூ.3 லட்சம் பெற்றுள்ளாா்.
சாக்கோட்டை வட்டாரத்தைச் சோ்ந்த கைவினைத் தொழிலாளி ராம்குமாா் கூறியதாவது: தையல் தொழிலை விரிவுபடுத்துவதற்காக காரைக்குடிகிளையின் மூலம் கடன் உதவியாக ரூ.3 லட்சம் எனக்கு வழங்கப்பட்டதால் தற்போது 4 பணியாளா்களுடன் தொழிலை விரிவுபடுத்தி நடத்தி வருகிறேன் என்றாா்.
