கள் மீதான தடையை தமிழக அரசு நீக்க வேண்டும் என்று நாம் தமிழா் கட்சியின் தலைமை ஒருங்கிணைப்பாளா் சீமான் தெரிவித்தாா்.
விழுப்புரம் மாவட்டம், விக்கிரவாண்டி வட்டம், வேம்பி மதுரா, பூரிகுடிசையில் தமிழ்நாடு பனையேறிகள் பாதுகாப்பு இயக்கம் சாா்பில், பனைக்கனவுத் திருவிழா சனிக்கிழமை நடைபெற்றது. இதில், பங்கேற்ற சீமான் பேசியதாவது:
பனையேறிகள் நலம் காப்பதற்காக, தமிழ்நாடு பனையேறிகள் பாதுகாப்பு இயக்கம் சாா்பில் கடந்த 4 ஆண்டுகளாக இவ்விழா முன்னெடுக்கப்பட்டுள்ளது. கள் நம் உணவு, உரிமை என்ற முழக்கத்தை முன்வைத்து பனையேறிகள் நலச்சங்கத்தினா் போராடி வருகின்றனா். 840 பொருள்களை மனிதனின் பயன்பாட்டுக்குத் தரக்கூடிய கற்பக தருவாக பனை மரம் விளங்குகிறது.
பனை ஏறுவது வேளாண்மை சாா்ந்தது. வேளாண்மை என்பது தொழில் அல்ல, அது பாரம்பரியம், வாழ்வியல் முறை. கள் போதைப்பொருள் அல்ல. அது உணவின் ஒரு பகுதி.
கள் மீதான தடையை தமிழக அரசு நீக்க வேண்டும் என்றாா் சீமான். விழாவின் தொடக்கமாக பனையேறிகள் பங்கேற்ற கள் ஊா்வலம் நடைபெற்றது. பனை மற்றும் பனை சாா்ந்த பொருள்களின் கண்காட்சி நடைபெற்றது. பனையேறும் வீர விளையாட்டுப் போட்டிகளும் நடைபெற்றன.
தமிழ்நாடு கள் இயக்க ஒருங்ணைப்பாளா் செ.நல்லசாமி மற்றும் பனையேறிகள் பாதுகாப்பு இயக்கத்தினா் கலந்துகொண்டனா்.
