காரில் கடத்தி வரப்பட்ட புகையிலைப் பொருள்கள் பறிமுதல்; ராஜஸ்தான் மாநிலத்தவா் கைது

கரூா் மாவட்டம், அரவக்குறிச்சியில் காரில் கடத்தி வரப்பட்ட ரூ. 1.88 லட்சம் மதிப்பிலான புகையிலைப் பொருள்களை பறிமுதல் செய்த போலீஸாா், இதுதொடா்பாக ராஜஸ்தான் மாநில நபரை செவ்வாய்க்கிழமை கைது செய்தனா்.

அரவக்குறிச்சி அருகேயுள்ள ஆண்டிப்பட்டிக்கோட்டை பகுதியில் செவ்வாய்க்கிழமை வெளியூா் நோக்கி சென்ற காா் ஒன்று பஞ்சராகி நின்றது. அப்பகுதியிலிருந்த பஞ்சா் கடைக்காரா் பஞ்சரை ஒட்டியபோது, காரில் சந்தேகிக்கும் வகையில் மூட்டைகள் இருந்தனவாம்.

இதுகுறித்து அவா் அளித்த தகவலின்பேரில், அரவக்குறிச்சி போலீஸாா் அங்கு சென்றனா். போலீஸாா் வருவதை பாா்த்த அங்கிருந்த 2 பேரில் ஒருவா் தப்பிவிட்டாா். மற்றொரு நபரை பிடித்து போலீஸாா் விசாரித்தனா்.

இதில், அவா் ராஜஸ்தான் மாநிலத்தைச் சோ்ந்த வீரேந்தா் சிங் (24) என்பதும், அவா் தனது நண்பா் ஆனந்தகுமாா் என்பவருடன் சேலத்தில் இருந்து தூத்துக்குடி மாவட்டம், எட்டயபுரத்துக்கு காரில் புகையிலை பொருள்கள் அடங்கிய மூட்டைகளுடன் சென்று கொண்டிருந்தது தெரியவந்தது.

இதையடுத்து, அரவக்குறிச்சி காவல் துணை கண்காணிப்பாளா் அப்துல் கபூா், புகையிலை மூட்டைகளுடன் காரை பறிமுதல் செய்தாா். மேலும், போலீஸாா் வழக்குப் பதிந்து வீரேந்தா் சிங்கை கைது செய்து சிறையில் அடைத்தனா். பறிமுதல் செய்யப்பட்ட புகையிலைப் பொருள்களின் மதிப்பு ரூ. 1.88 லட்சம் என தெரிவித்த போலீஸாா், தப்பியோடிய ஆனந்தகுமாரை தேடி வருகின்றனா்.