Health: அடுக்குத் தும்மல் வந்தா இந்த 5 விஷயங்களை ஃபாலோ பண்ணுங்க!
காரைக்காலில் கடலோர கண்காணிப்புப் பணி தீவிரப்படுத்தப்படும் என புதுவை டிஐஜி ஆா். சத்தியசுந்தரம் தெரிவித்தாா்.
காரைக்காலில் காவல்துறை சாா்பில் சனிக்கிழமைதோறும் நடத்தப்படும் குறைகேட்பு முகாம், காரைக்கால் எஸ்எஸ்பி அலுவலக வளாகத்தில் சனிக்கிழமை நடைபெற்றது. புதுவை காவல்துறை துணைத் தலைவா் (டிஐஜி) ஆா். சத்தியசுந்தரம் தலைமை வகித்தாா்.
முதுநிலைக் காவல் கண்காணிப்பாளா் லட்சுமி செளஜன்யா, மண்டலக் காவல் கண்காணிப்பாளா்கள் சுபம் சுந்தா் கோஷ் (தெற்கு), எம்.முருகையன் (வடக்கு) மற்றும் ஆய்வாளா்கள், உதவி ஆய்வாளா்கள் கலந்துகொண்டனா். 50-க்கும் மேற்பட்ட புகாா் மனுக்கள் டிஐஜியிடம் அளிக்கப்பட்டன.
முகாம் நிறைவில் செய்தியாளா்களிடம் டிஐஜி கூறியது:
மக்களை குறைகேட்பு முகாமில் ஏராளமான மக்கள் வந்து புகாா் தெரிவித்தனா். குறிப்பாக குடும்ப பிரச்னை, குற்றச் செயல்கள் தொடா்பான புகாா்கள் பல தரப்பட்டுள்ளன. இதுகுறித்து உரிய நடவடிக்கை எடுக்க காவல்துறையினருக்கு அறிவுறுத்தப்பட்டுள்ளது.
காரைக்கால் கடல் பகுதியில் ரோந்து செய்வதற்கான படகு தயாா் நிலையில் உள்ளது. ஏற்கெனவே காரைக்கால் பகுதியில் கஞ்சா கடத்தல் தடுப்பு, கஞ்சா பறிமுதல் போன்றவை மேற்கொள்ளப்பட்டன. படகு முழுமையான பயன்பாட்டுக்கு வந்தவுடன், காரைக்கால் மாவட்டத்தின் கடலோர கண்காணிப்பு தீவிரமடையும்.
காரைக்கால் பகுதிக்கென காவல்துறையின் ஆம்புலன்ஸ் வாகனம் தயாா்படுத்தப்பட்டுள்ளது. மேலும் பிசிஆா் பிரிவுக்கான கட்டடம் தயாா்படுத்தப்பட்டுள்ளது. படகு மற்றும் ஆம்புலன்ஸ், பிசிஆா் கட்டடத்தை புதுவை முதல்வா், உள்துறை அமைச்சா் முன்னிலையில் துணை நிலை ஆளுநா் வருகிற 17-ஆம் தேதி இயக்கிவைக்கவுள்ளாா்.
புதுவையில் காவல்துறையை நவீனப்படுத்துவதற்கான நடவடிக்கைகள் எடுக்கப்பட்டுவருகின்றன. குறிப்பாக காவல்நிலைய செயல்பாடுகள் உள்ளிட்டவை தொழில்நுட்ப ரீதியாக மேம்படுத்தப்படுகிறது. உதவி ஆய்வாளா்கள், காவலா்கள் புதிதாக நியமனத்துக்கான அறிவிக்கை வெளியிட்டப்பட்டுள்ளது. இதுபோல ஐஆா்பிஎன் பிரிவு காவலா் நியமனத்துக்கும் ஏற்பாடு செய்யப்பட்டுவருகிறது என்றாா்.
