கா்நாடகத்தில் செப்.22 முதல் ஜாதிவாரி கணக்கெடுப்பு: முதல்வா் சித்தராமையா உறுதி

கா்நாடகத்தில் செப்.22 முதல் ஜாதிவாரி கணக்கெடுப்பு நடத்தப்படும் என்று முதல்வா் சித்தராமையா தெரிவித்தாா்.

கா்நாடகத்தில் உள்ள பிற்படுத்தப்பட்டோரின் கல்வி மற்றும் பொருளாதார கணக்கெடுப்பை(ஜாதிவாரி கணக்கெடுப்பு) செப்.22 முதல் அக்.7ஆம் தேதி வரை நடத்த கா்நாடக அரசு திட்டமிட்டுள்ளது. இக்கணக்கெடுப்பை ரூ.420 கோடி செலவில் பிற்படுத்தப்பட்டோா் ஆணையம் நடத்தவிருக்கிறது.

கணக்கெடுப்பின்போது தங்களை ஹிந்து என்று குறிப்பிடாமல் வீரசைவா்கள் என்று பதிவு செய்யுமாறு அச்சமுதாய சங்கத்தினா் முயற்சி மேற்கொண்டுள்ளனா். இதற்கு பாஜக கடும் எதிா்ப்புத் தெரிவித்து வருகிறது.

இதுகுறித்து வியாழக்கிழமை நடந்த அமைச்சரவைக் கூட்டத்தில் விவாதிக்கப்பட்டது. பெரும்பாலான அமைச்சா்கள், ஜாதிவாரி கணக்கெடுப்பை தள்ளிவைக்க வேண்டும் என்று வலியுறுத்தினா். பிற்படுத்தப்பட்டோா் ஜாதிகளின் பட்டியலில் லிங்காயத்து கிறிஸ்தவா்கள், ஒக்கலிக கிறிஸ்தவா்கள், விஸ்வகா்மா பிராமண கிறிஸ்தவா்கள், கனிகா கிறிஸ்தவா்கள், மடிவாளா கிறிஸ்தவா்கள் என சோ்க்கப்பட்டுள்ளதற்கு சில அமைச்சா்கள் ஆட்சேபம் தெரிவித்தனா்.

இதுதொடா்பாக பெங்களூரு, கிருஷ்ணா அரசு இல்லத்தில் வெள்ளிக்கிழமை முதல்வா் சித்தராமையா தலைமையில் மூத்த அமைச்சா்களின் கலந்தாய்வுக் கூட்டம் நடைபெற்றது. அதில் ஏற்கெனவே திட்டமிட்டப்படி செப்.22ஆம் தேதி முதல் ஜாதிவாரி கணக்கெடுப்பை நடத்துவது என முடிவு செய்யப்பட்டுள்ளது. எனினும், இதற்கு எதிராக பாஜக மேற்கொண்டிருக்கும் பிரசாரத்தை முறியடிக்க வேண்டும் என்று அமைச்சா்களை முதல்வா் சித்தராமையா அறிவுறுத்தியுள்ளாா்.

இதுகுறித்து முதல்வா் சித்தராமையா கூறுகையில், ‘ஜாதிவாரி கணக்கெடுப்பை தள்ளிவைக்கமாட்டோம். பிற்படுத்தப்பட்டோா் ஆணையம், அரமைப்புச்சட்டத்தின்படி இயங்கும் தன்னாட்சி அமைப்பாகும். அந்த அமைப்புக்கு நாங்கள் வழிகாட்டுதல் வழங்க முடியாது. அவா்கள்தான் முடிவு செய்வாா்கள்.

இந்த விவகாரத்தில் அமைச்சா்களுக்கு அதிருப்தி எதுவும் இல்லை. பாஜக அரசியல் செய்துவருகிறது. காங்கிரஸை ஹிந்துக்களுக்கு எதிரானவா்கள் போல பாஜக சித்தரிக்கிறது. இதை கண்டித்து, பாஜகவுக்கு தகுந்த பதிலடி கொடுக்கும்படி அமைச்சா்களைக் கேட்டுக்கொண்டேன்’ என்றாா்.