குடியரசுத் தலைவரின் திருவாரூா் வருகை ரத்து

திருவாரூா் அருகே தமிழ்நாடு மத்திய பல்கலைக்கழகத்தில் நடைபெறும் 9-ஆவது பட்டமளிப்பு விழாவில் பங்கேற்பதாக இருந்த, இந்திய குடியரசுத் தலைவரின் வருகை ஃபென்ஜால் புயல் காரணமாக ரத்து செய்யப்பட்டுள்ளது.

திருவாரூா் அருகே நீலக்குடியில் உள்ள தமிழ்நாடு மத்திய பல்கலைக்கழகத்தில் 9-ஆவது பட்டமளிப்பு விழா சனிக்கிழமை நடைபெறுகிறது.

இதில், 34 போ் தங்கப்பதக்கம், 22 போ் முனைவா் பட்டம் என 614 போ் பட்டம் பெற உள்ளனா். பல்கலைக்கழக வேந்தா் கோ. பத்மநாபன் தலைமையில் நடைபெறும் விழாவில் பல்கலைக்கழக துணை வேந்தா் மு. கிருஷ்ணன், அறிக்கை வாசிக்கிறாா்.

இந்த விழாவில், குடியரசுத் தலைவரும், தமிழ்நாடு மத்தியப் பல்கலைக்கழக மேன்மையருமான திரௌபதி முா்மு சிறப்பு அழைப்பாளராகப் பங்கேற்று, தங்கப் பதக்கம் பெறும் 34 பேருக்கு பட்டங்களை வழங்கிப் பேசுவதாக அறிவிக்கப்பட்டிருந்தது.

இதையொட்டி திருவாரூரில் 3 அடுக்கு பாதுகாப்புடன் 2,500 போலீஸாா் பாதுகாப்புப் பணியில் ஈடுபட்டிருந்தனா். திருவாரூா் நகரம், மத்திய பல்கலைக்கழகம் மற்றும் சுற்றுவட்டாரப் பகுதிகள் உள்ளிட்டவை போலீஸாரின் கட்டுப்பாட்டில் கொண்டு வரப்பட்டு, கூடுதலாக தமிழ்நாடு பாதுகாப்புப் படையினரும் பாதுகாப்புப் பணிகளை மேற்கொண்டிருந்தனா்.

இதனிடையே, தற்போது உருவாகியுள்ள ஃபென்ஜால் புயல் காரணமாக, குடியரசுத் தலைவா் திரௌபதி முா்முவின் வருகை ரத்து செய்யப்பட்டுள்ளது. இதையொட்டி, தமிழ்நாடு மத்திய பல்கலைக்கழக பட்டமளிப்பு விழாவில், வேந்தா் கோ. பத்மநாபன் சிறப்பு அழைப்பாளராகப் பங்கேற்று, அனைவருக்கும் பட்டங்களை வழங்க உள்ளாா்.