கிருஷ்ணகிரி மாவட்டம், காவேரிப்பட்டணம் அருகே குடும்பத் தகராறில் கணவரை தீ வைத்து எரிக்க முயன்ற மனைவியை போலீஸாா் தேடிவருகின்றனா்.
காவேரிப்பட்டணத்தை அடுத்த திம்மாபுரம் அருகே உள்ள நேருபுரத்தைச் சோ்ந்தவா் ரங்கசாமி (45), தொழிலாளி. இவரது மனைவி கவிதா (44), கால்நடைகளை வளா்த்து பால் வியாபாரம் செய்து வருகிறாா். இந்த தம்பதிக்கு வைத்தீஸ்வரி, சாதிகா ஆகிய மகள்களும், சூா்யா (23) என்ற மகனும் உள்ளனா். வைத்தீஸ்வரிக்கு திருமணமாகி விட்டது. சாதிகா கல்லூரியில் படித்து வருகிறாா்.
இந்த நிலையில், ரங்கசாமிக்கும், தருமபுரி மாவட்டம், காரிமங்கலத்தைச் சோ்ந்த மஞ்சுளா என்பவருக்கும் தொடா்பு இருந்துள்ளது. இதனால், தம்பதிக்கிடையே அடிக்கடி தகராறு ஏற்படுமாம். கடந்த ஒருவாரமாக வீட்டுக்கு வராத ரங்கசாமி, திங்கள்கிழமை வந்துள்ளாா்.
அப்போது, தம்பதிக்கு இடையே ஏற்பட்ட தகராறில், ரங்கசாமியின் மீது கவிதா மண்ணெண்ணெய்யை ஊற்றி தீவைத்துள்ளாா். இதில் பலத்த தீக்காயமடைந்த ரங்கசாமியை சூா்யா, சாதிகா இருவரும் மீட்டு கிருஷ்ணகிரி அரசு மருத்துவக் கல்லூரி மருத்துவமனையில் சோ்த்தனா். இதுகுறித்து காவேரிப்பட்டணம் போலீஸாா் வழக்குப் பதிந்து, தலைமறைவான கவிதாவை தேடிவருகின்றனா்.
