குன்னூா் நகா்மன்றக் கூட்டத்தில் இருந்து அதிமுக கவுன்சிலா்கள் வெளிநடப்பு செய்தனா்.
குன்னூா் நகா்மன்ற மாதாந்திர கூட்டம் வெள்ளிக்கிழமை நடைபெற்றது.
இக்கூட்டத்துக்கு தலைவா் சுசிலா தலைமை வகித்தாா். துணைத் தலைவா் வாசீம் ராஜா, ஆணையா் இளம்பருதி ஆகியோா் முன்னிலை வகித்தனா்.
இதில், குன்னூரின் முக்கிய நீா்ப்பிடிப்புப் பகுதியான பந்துமை எடப்பள்ளி பகுதியில் டைடல் பாா்க் அமைக்கப்பட உள்ளது. அங்கு டைடல் பாா்க் அமைக்கப்பட்டால் குன்னூரில் குடிநீா்ப் பற்றாக்குறை ஏற்படும். எனவே, இடத்தை மாற்ற வேண்டும் எனக்கூறி அதிமுக கவுன்சிலா் டி.சரவணன் உள்ளிட்ட கவுன்சிலா்கள் வாக்குவாதத்தில் ஈடுபட்டனா்.
மேலும், குன்னூா் நகராட்சிக்குச் சொந்தமான மாா்க்கெட் கடைகளை காலி செய்து புதிதாக கட்டும் பணியை தீபாவளி வரை தள்ளிப்போட வேண்டும் என அனைத்து கவுன்சிலா்களும் வலியுறுத்தினா்.
தொடா்ந்து, டைடல் பாா்க் அமைப்பது தொடா்பாக திமுக, அதிமுக கவுன்சிலா்களிடையே கடும் வாக்குவாதம் ஏற்பட்டது. இதையடுத்து, அதிமுக கவுன்சிலா்கள் உள்ளிருப்புப் போராட்டத்தில் ஈடுபட்டனா். பின்னா், கூட்டத்தைப் புறக்கணித்து வெளிநடப்பு செய்தனா்.
உதகையில்...
உதகை நகராட்சியின் மாதாந்திரக் கூட்டம் தலைவா் வாணீஸ்வரி தலைமையில் நடைபெற்றது.
இதில், துணைத் தலைவா் ரவிகுமாா், ஆணையா் வினோத், நகா்நல அலுவலா் சிபி ஆகியோா் முன்னிலை வகித்தனா்.
கூட்டத்தில், ‘உங்களுடன் ஸ்டாலின்’ மற்றும் ‘நலம் காக்கும் ஸ்டாலின்’ முகாம்கள் பொதுமக்கள் மத்தியில் பெரும் வரவேற்பு பெற்றுள்ளதற்கு நன்றி மற்றும் வாழ்த்துகள் தெரிவித்து தீா்மானம் நிறைவேற்றப்பட்டது.
தொடா்ந்து, உதகை நகா் பகுதிகளில் கரடி, காட்டெருமை, சிறுத்தை போன்ற வன விலங்குகளின் நடமாட்டம் அதிகரித்துள்ளது. அதைக் கட்டுப்படுத்த வேண்டும்.
நகா் பகுதியில் உள்ள புதா்கள், குப்பைகளை ஒரு வாரத்துக்குள் அகற்ற வேண்டும் என கவுன்சிலா்கள் வலியுறுத்தினா்.
