குழந்தைகள் அறிவியல் திருவிழா: 6 முதல் 8-ஆம் வகுப்பு மாணவா்களுக்கு அழைப்பு

அரசு மற்றும் அரசு உதவிப் பெறும் பள்ளிகளில், 6 முதல் 8-ஆம் வகுப்பு வரை பயிலும் மாணவா்களுக்கு ‘குழந்தைகள் அறிவியல் திருவிழா‘ நடைபெறவுள்ளது என நாகை மாவட்ட ஆட்சியா் ப. ஆகாஷ் தெரிவித்துள்ளாா்.

இதுகுறித்து அவா் வெளியிட்ட செய்திக் குறிப்பு:

பள்ளி மாணவா்களுக்கு ஏப்ரல் 24 ஆம் தேதி முழுவாண்டுத் தோ்வுகள் முடிவடைந்து கோடை விடுமுறை தொடங்கவிருக்கிறது. மாணவா்களின் கோடை விடுமுறையை பயனுள்ளதாகவும், அறிவியல், கலை மற்றும் கதை சொல்லல் போன்ற துறைகளில் ஆா்வத்தை தூண்டும் வகையிலும் ஒரு மகிழ்ச்சிகரமான கற்றல் சூழலை உருவாக்கும் நோக்கில், நாகை மாவட்ட நிா்வாகம், பள்ளிக் கல்வித் துறை, மாவட்ட கல்வி தன்முனைப்பு திட்டம் மற்றும் தமிழ்நாடு அறிவியல் இயக்கம் இணைந்து குழந்தைகள் அறிவியல் திருவிழா (கோடைகால சிறப்பு பயிற்சி முகாம்) ஒன்றை நடத்தவுள்ளது.

நாகை மாவட்டத்திலுள்ள அரசு மற்றும் அரசு உதவிப் பெறும் பள்ளிகளில் 6 முதல் 8-ஆம் வகுப்பு வரை பயிலும் மாணவா்களுக்கு, இரண்டு நாள்கள் தங்கும் வசதியுடன் கூடிய ‘குழந்தைகள் அறிவியல் திருவிழா’ இம்மாத இறுதியில் மூன்று மையங்களில் நடைபெறுகிறது.

இம்முகாம் ஏப்ரல் 27 மற்றும் 28 ஆம் தேதிகளில், நாகை மற்றும் திருமருகல் ஒன்றியங்களைச் சோ்ந்த பள்ளி மாணவா்களுக்கு நாகையிலுள்ள சின்மயா வித்யாலயா பள்ளியிலும், ஏப்ரல் 29, 30 ஆம் தேதிகளில் கீழ்வேளூா் மற்றும் கீழையூா் ஒன்றியங்களைச் சோ்ந்த பள்ளி மாணவா்களுக்கு கீழையூா் ஆரிஃபா கல்லூரியிலும், மே 4, 5 ஆம் தேதிகளில் வேதாரண்யம் மற்றும் தலைஞாயிறு ஒன்றியங்களை சோ்ந்த பள்ளி மாணவா்களுக்கு வேதாரண்யம் பகுதியிலும் நடைபெறவுள்ளது.

இதில் கலந்துகொள்ள விரும்பும் மாணவா்கள் பெற்றோா் அனுமதியுடன் தங்கள் பள்ளி ஆசிரியா்கள் அல்லது தலைமையாசிரியரை தொடா்பு கொள்ளலாம் எனக் குறிப்பிட்டுள்ளாா்.