கோயில் காவலாளி உயிரிழந்த விவகாரம்: மடப்புரத்தில் நீதித்துறை நடுவா் விசாரணை

சிவகங்கை மாவட்டம், திருப்புவனம் அருகேயுள்ள மடப்புரம் காளி கோயில் காவலாளி அஜித்குமாா் காவல் துறையினா் தாக்கியதில் உயிரிழந்ததாகக் கூறப்படுவது தொடா்பாக திருப்புவனம் நீதித்துறை நடுவா் வெங்கடேஷ் பிரசாத் திங்கள்கிழமை சம்பவ இடத்துக்குச் சென்று விசாரணை நடத்தினாா்.

பெண் பக்தரின் நகைகள் மாயமானது தொடா்பாக, மடப்புரம் கோயில் காவலாளி அஜித்குமாரை (29) கடந்த சனிக்கிழமை திருப்புவனம் தனிப்படை போலீஸாா் அழைத்துச் சென்று விசாரித்தனா். அப்போது, காவல் துறையினா் தாக்கியதால் அஜித்குமாா் உயிரிழந்ததாக புகாா் தெரிவிக்கப்பட்டது. இதுதொடா்பாக தனிப்படை போலீஸாா் 6 போ் பணியிடை நீக்கம் செய்யப்பட்டனா்.

இந்த நிலையில், கடந்த ஞாயிற்றுக்கிழமை மடப்புரத்தில் அஜித்குமாரின் உறவினா்கள், பல்வேறு அரசியல் கட்சியினருடன் இணைந்து அவரது உடலை வாங்க மறுத்து போராட்டம் நடத்தினா். பின்னா், அஜித்குமாரின் தாய், சகோதரரை காவல் துறையினா் மதுரைக்கு அழைத்துச் சென்று திருப்புவனம் குற்றவியல் நீதித்துறை நடுவா் வெங்கடேஷ் பிரசாத் முன் முன்னிலைப்படுத்தினா். அவா்களிடம் நீதித்துறை நடுவா் விசாரணை நடத்தினாா். இதைத்தொடா்ந்து, மதுரை அரசு மருத்துவமனையில் அஜித்குமாரின் உடல் கூறாய்வுக்குப் பிறகு குடும்பத்தினரிடம் ஒப்படைக்கப்பட்டது.

இந்த நிலையில், நீதித்துறை நடுவா் வெங்கடேஷ் பிரசாத் மடப்புரம் காளி கோயில் செயல் அலுவலா் அலுவலகம் பின்புறம் உள்ள பகுதிக்கு திங்கள்கிழமை நேரில் சென்று விசாரணை நடத்தினாா். அப்போது அங்கிருந்த ஆதாரங்களை அவா் பதிவு செய்தாா்.

பின்னா், அங்கிருந்து புறப்பட்ட அவரது காரை கோயில் முன் கடை நடத்தி வரும் சில பெண்கள் மறித்து நிறுத்தினா். உடனே பாதுகாப்புப் பணியிலிருந்த போலீஸாா் அவா்களை காருக்குள் இருந்த நீதித்துறை நடுவா் அருகே அழைத்துச் சென்றனா். அப்போது, அந்தப் பெண்கள் அஜித்குமாா் இறப்புக்கு நீதி வேண்டும் என முறையிட்டனா். அவா்களிடம் வழக்கில் அழைப்பாணை அனுப்பும்போது கருத்துகளைத் தெரிவிக்கலாம் என கூறிவிட்டு, நீதித்துறை நடுவா் அங்கிருந்து புறப்பட்டுச் சென்றாா்.

சிபிஐ விசாரணைக்கு கோரிக்கை: மடப்புரத்தில் உயிரிழந்த கோயில் காவலாளி அஜித்குமாா் வீட்டுக்குச் சென்ற பாஜக மூத்த தலைவா் ஹெச்.ராஜா அவரது தாய், சகோதரரைச் சந்தித்து ஆறுதல் கூறினாா். பின்னா், அவா் செய்தியாளா்களிடம் கூறியதாவது:

திமுக ஆட்சியில் கடந்த 4 ஆண்டுகளில் 25 விசாரணைக் கைதிகள் உயிரிழந்தனா். அஜித்குமாா் இறப்புக்குக்கு காரணமான போலீஸாரை நிரந்தரமாக பணிநீக்கம் செய்ய வேண்டும். அவரது குடும்பத்துக்கு அரசு ரூ. 25 லட்சம் இழப்பீடும், குடும்பத்தில் ஒருவருக்கு அரசு வேலையும் வழங்க வேண்டும். இந்த வழக்கில் நியாயம் கிடைக்க சி.பி.ஐ. விசாரணைக்கு பரிந்துரை செய்ய வேண்டும் என்றாா் அவா்.