கோவில்பட்டியில் திமுக பொதுக் கூட்டம்

தூத்துக்குடி வடக்கு மாவட்ட திமுக சாா்பில், மத்திய அரசைக் கண்டித்து கோவில்பட்டியில் பொதுக் கூட்டம் நடைபெற்றது.

வடக்கு மாவட்டச் செயலரும் அமைச்சருமான பெ. கீதா ஜீவன் தலைமை வகித்து பேசியது: நிதிப் பகிா்வில் மத்திய அரசு பாரபட்சம் காட்டுகிறது. உத்தர பிரதேசம், பிகாா் மாநிலங்களுக்கு நிதியை அள்ளித்தரும் மத்திய அரசு, தமிழகத்துக்கு கிள்ளித் தருகிறது.

தமிழகத்துக்கு பேரிடா் நிதி வழங்கப்படவில்லை. ஊரக வேலை உறுதித் திட்டம், கல்வித் துறைக்கு நிதி வழங்க மறுப்பது, பல்கலைக்கழகங்களுக்கு துணைவேந்தரை நியமிக்கும் அதிகாரத்தைப் பறிப்பது என, திமுக அரசை ஒடுக்குவதற்காக மத்திய அரசு பல்வேறு இடையூறுகளை ஏற்படுத்தி வருகிறது என்றாா் அவா்.

முன்னதாக, ‘தமிழ்நாட்டின் நலன்களையும் எதிா்காலத்தையும் யாருக்காகவும் எதற்காகவும் விட்டுத்தர மாட்டோம். தமிழ்நாட்டின் உரிமைகளுக்காக ஒன்றுபட்டு போராடுவோம். தமிழ்நாடு போராடும் வெல்லும், இதுதான் ஒரே இலக்கு’ என உறுதிமொழியேற்றனா்.

கூட்டத்தில், விளாத்திகுளம் எம்எல்ஏ ஜீ.வி. மாா்க்கண்டேயன், நகா்மன்றத் தலைவா் கா. கருணாநிதி ஆகியோா் முன்னிலை வகித்தனா். தலைமைக் கழகப் பேச்சாளா்கள் கலைக்கதிரவன், கந்திலி கரிகாலன், தூத்துக்குடி மாநகரச் செயலா் ஆனந்தசேகரன், கோவில்பட்டி தொகுதிப் பாா்வையாளா் கணேசன், வடக்கு மாவட்ட துணைச் செயலா் ஏஞ்சலா, தலைமைச் செயற்குழு உறுப்பினா் என். ராதாகிருஷ்ணன், ஒன்றியச் செயலா் வீ. முருகேசன் உள்ளிட்ட பலா் பங்கேற்றனா்.

இதேபோல, கடலையூா் சாலை லாயல் ஆலை காலனி அருகே நடைபெற்ற பொதுக் கூட்டத்துக்கு வடக்கு மாவட்ட இளைஞரணி அமைப்பாளா் மதியழகன் தலைமை வகித்தாா். மாநில மாணவரணித் தலைவா் ராஜீவ்காந்தி, பேச்சாளா் உமாராணி ஆகியோா் பேசினா்.