``வாழ்நாள் முழுவதுமான சினிமாவின் முதல்படி..'' - நடிகையாகும் மகள் விஸ்மயாவுக்கு மோகன்லால் வாழ்த்து!

மலையாள சூப்பர் ஸ்டார் நடிகர் மோகன்லாலின் மகன் பிரணவ் சினிமாக்களில் நடித்துவருகிறார். அவரைத்தொடர்ந்து மோகன்லாலின் மகள் விஸ்மயா மோகன்லால் சினிமாவில் கதாநாயகியாக அறிமுகம் ஆக உள்ளார்.

விஸ்மயா தாய் தற்காப்பு கலையில் தேர்ச்சிபெற்றவர். பயணங்களிலும், எழுத்துக்களிலும் அதீத ஆர்வம் கொண்டவர். விஸ்மயா மோகன்லால் எழுதிய கிரெய்ன்ஸ் ஆஃப் ஸ்டார்டஸ்ட் (Grains Of Stardust) புத்தகம் கவனம் பெற்றிருந்தது. சினிமாவில் ஆர்வம் இல்லை என கூறிவந்தார் விஸ்மயா. பொது நிகழ்ச்சிகளில் தலைகாட்டுவதை தவிர்த்தும் வந்தார்.

இந்த நிலையில் விஸ்மயா மோகன்லால் சினிமாவில் கதாநாயகியாக அறிமுகம் ஆக உள்ளதாக அதிகாரப்பூர்வ அறிவிப்பு வெளியாகி உள்ளது. ஆன்றணி பெரும்பாவூரின் ஆசீர்வாத் சினிமாஸின் 37-வது சினிமாவான துடக்கம் என்ற சினிமாவில் கதாநாயகியாக நடிக்கிறார். ஜூட் ஆன்றணி ஜோசப் திரைக்கதை எழுதி இயக்குகிறார்.

ஆசீர்வாத் சினிமாஸ் தயாரித்துள்ள சினிமாக்களில் ஒருசிலவற்றை தவிர மற்ற அனைத்திலும் மோகன்லால் கதாநாயகனாக நடித்துள்ளார்.

சினிமாவில் முதன் முதலாக அடியெடுத்து வைக்கும் மகள் விஸ்மயாவுக்கு வாழ்த்து தெரிவித்துள்ளார் மோகன்லால். "அன்புள்ள மாயாக்குட்டி, துடக்கம் என்ற சினிமா வாழ்நாள் முழுவதுமான உனது சினிமாவின் அன்பு பந்தத்துக்கு முதல்படியாக அமையட்டும்" என மோகன்லால் வாழ்த்தியுள்ளார்.

மேலும், துடக்கம் சினிமா போஸ்டரை ஃபேஸ்புக்கில் ஷேர் செய்து மகிழ்ச்சியை வெளிப்படுத்தி உள்ளார் மோகன்லால்.

இதுபற்றி இயக்குநர் ஜூட் ஆன்றணி ஜோசப் கூறுகையில், "எனது லாலேட்டனுடையவும், சுஜி சேச்சியுடையவும் அன்பு மகள் மாயா-வின் முதல் சினிமாவை என்னை நம்பி ஒப்படைக்கும்போது அவர்களின் கண்களில் மகிழ்ச்சியையும், எதிர்பார்ப்பையும் பார்த்தேன். அவர்களின் நம்பிக்கையை நான் வீணாக்கமாட்டேன். இது ஒரு குட்டி சினிமா. எப்போதும் என் மனது சொல்லும் சினிமாக்களைதான் நான் இயக்குவேன். இதுவும் அப்படித்தான். இது தொடக்கம் ஆகட்டும் என ஆத்மார்த்தமாக விரும்புகிறேன்" என்றார்.

துடக்கம் சினிமா-வுக்கான டைட்டில் போஸ்டரில் தற்காப்புகலை குறித்த சிம்பல்கள் இடம்பெற்றுள்ளன. எனவே இது தற்காப்புகலை சம்பந்தமான சினிமாவாக இருக்கலாம் என கூறப்படுகிறது. மோகன்லால் தனது மகன் பிரணவ் நடித்த முதல் சினிமாவில் ஒரு சில காட்சிகளில் முகம் காட்டினார். அதுபோன்று தனது மகள் விஸ்மயாவின் முதல் சினிமாவிலும் சில காட்சிகளில் மோகன்லால் நடிக்க வாய்ப்பு உள்ளதாக கூறப்படுகிறது.