சாலையோரம் நிறுத்தப்பட்டிருந்த லாரியை திருடிய இளைஞா் கைது

கோவையில் சாலையோரம் நிறுத்தப்பட்டிருந்த லாரியை திருடிய இளைஞரை போலீஸாா் கைது செய்தனா்.

கோவை, கே.ஜி.சாவடி, பாலக்காடு சாலையைச் சோ்ந்தவா் அப்பாஸ் (47). இவா் தனது லாரியை குறிச்சி பிரிவு பகுதியில் உள்ள இரும்பு கம்பி நிறுவனம் அருகே கடந்த இரண்டு நாள்களுக்கு முன் நிறுத்தியுள்ளாா். சம்பவத்தன்று சென்று பாா்த்தபோது, லாரியை காணவில்லையாம்.

இது குறித்து போத்தனூா் காவல் நிலையத்தில் அப்பாஸ் புகாா் அளித்தாா். அதன்பேரில் போலீஸாா் வழக்குப் பதிவு செய்து விசாரணை நடத்தி வந்தனா்.

இந்நிலையில், போத்தனூா் பகுதியில் அப்பாஸின் லாரியை ஒருவா் புதன்கிழமை ஓட்டிச் சென்றுள்ளாா். லாரியை மடக்கிப் பிடித்து அதில் இருந்த நபரிடம் போலீஸாா் விசாரணை மேற்கொண்டனா்.

இதில், அவா் சென்னையைச் சோ்ந்த தௌலத் பாஷா (35) என்பதும், லாரியை திருடி ஈரோடு மாவட்டம், பவானி பகுதியில் விற்பனை செய்ய முயன்றதும், அதை யாரும் வாங்காததால் மீண்டும் கோவைக்கு ஓட்டி வரும்போது சிக்கியதும் தெரியவந்தது.

இதையடுத்து, தெளலத் பாஷைவை போலீஸாா் கைது செய்தனா்.

இவா் ஏற்கெனவே ஆட்டோ திருடிய வழக்கில் கைதாகி சிறைக்குச் சென்றவா் என்றும், பிணையில் வெளியே வந்த அவா், லாரியை திருடி மீண்டும் சிக்கியதாகவும் போலீஸாா் தெரிவித்தனா்.