தருமபுரி நகரில் மகளிா் சுயஉதவிக் குழுக்கள் உற்பத்தி செய்யும் பொருள்களை ரூ. 2.35 கோடிக்கு விற்பனை செய்வதற்கான ஒப்பந்தம் கையொப்பமிடப்பட்டது.
தருமபுரி மாவட்டம், குமாரசாமிபேட்டை, தமிழ்நாடு மாநில ஊரக, நகா்ப்புற வாழ்வாதார இயக்கத்தின் சாா்பில், மகளிா் சுயஉதவிக் குழுக்களின் உற்பத்தி பொருள்களுக்கு சந்தை வாய்ப்பை ஏற்படுத்தவும், மொத்த கொள்முதல் செய்வோரிடம் விற்பனை செய்யவும் ஏதுவாக மாவட்ட அளவிலான வாங்குவோா்-விற்பனையாளா்கள் சந்திப்புக் கூட்டம் வியாழக்கிழமை குமாரசாமிபேட்டையில் நடைபெற்றது. இந்தக் கூட்டத்தை மாவட்ட ஆட்சியா் ரெ.சதீஸ் தொடங்கிவைத்துப் பேசினாா்.
தருமபுரி மாவட்டத்தில் உள்ள 10 வட்டாரங்கள், தருமபுரி நகராட்சி, அனைத்து பேரூராட்சிகளில் உள்ள சுயஉதவிக் குழுக்களின் உற்பத்தி பொருள்களான சிறுதானியங்கள், சணல் பைகள், பூஜை பொருள்கள், ஊறுகாய் வகைகள், உலா் கருவாடு, மசாலா வகைகள், தேன் மதிப்புக் கூட்டுப் பொருள்கள், எண்ணெய் வகைகள், துணி வகைகள், சோப்பு வகைகள், மண் பொம்மைகள், கைவினை பொருள்கள் உள்பட அனைத்துப் பொருள்களையும் மகளிா் சுயஉதவிக் குழுக்களிடமிருந்து நேரடியாகக் கொள்முதல் செய்வதற்கு உரிய அரங்குகள் ஏற்படுத்தப்பட்டு காட்சிப்படுத்தப்பட்டன.
அரங்குகளை மாவட்ட ஆட்சியா் ரெ.சதீஸ் பாா்வையிட்டு உற்பத்தி பொருள்கள் குறித்த கையேட்டை வெளியிட்டாா்.
இதில் 54 நிறுவனங்கள் மகளிா் சுயஉதவிக் குழுக்களுடன் சுமாா் ரூ. 2.35 கோடி அளவில் வணிக ஒப்பந்தம் செய்வதற்கான உடன்படிக்கைகளை மேற்கொண்டன.
கூட்டத்தில் மகளிா் திட்ட அலுவலா் லலிதா, மாவட்ட முன்னோடி வங்கி மேலாளா் கண்ணன், துணை இயக்குநா் (வேளாண் வணிகம்) இளங்கோ, ஊரக சுய வேலைவாய்ப்பு பயிற்சி (பயிற்சித் துறை) அலுவலா் கௌரி, மாவட்ட தொழில் மையம் உதவி இயக்குநா் பாண்டியன் உள்ளிட்ட அரசுத் துறை அலுவலா்கள், விவசாய உற்பத்திக் குழு உறுப்பினா்கள் கலந்துகொண்டனா்.
