`டெஸ்ட் வரலாற்றில் இந்தியாவின் மோசமான சாதனை டு ரூட்டின் யுனிக் சாதனை' - ENG vs IND போட்டி சாதனைகள்

இங்கிலாந்துக்கெதிரான 5 போட்டிகள் கொண்ட டெஸ்ட் தொடரில், ஹெடிங்லி மைதானத்தில் ஜூன் 20 முதல் 24 வரை நடைபெற்ற முதல் டெஸ்டில் இந்திய அணியை 5 விக்கெட்டுகள் வித்தியாசத்தில் இங்கிலாந்து வீழ்த்தியது.

முதல் இன்னிங்ஸில் ஜெய்ஸ்வால், கில், பண்ட் ஆகியோரின் சதங்களால் இந்தியா 471 ரன்கள் குவித்தது.

அதைத்தொடர்ந்து பவுலிங்கில் பும்ரா 5 விக்கெட்டுகள் வீழ்த்திய போதிலும், ஒல்லி போப்பின் சதம் மற்றும் பென் டக்கெட், ஹாரி ப்ரூக்கின் அரைசதங்களால் இங்கிலாந்து 465 ரன்கள் குவித்தது.

அதையடுத்து, 6 ரன்கள் முன்னிலையுடன் இரண்டாவது இன்னிங்ஸ் ஆடிய இந்தியா, கே.எல். ராகுல் மற்றும் பண்ட்டின் சதங்களால் இங்கிலாந்துக்கு 371 ரன்கள் இலக்கு நிர்ணயித்தது.

அந்த இலக்கையும், கடைசி நாளில் மட்டும் பென் டக்கெட்டின் சதம் மற்றும் ஜாக் க்ராவ்லி, ஜோ ரூட்டின் அரைசதங்களால் 352 ரன்கள் அடித்து 5 விக்கெட்டுகள் வித்தியாசத்தில் இங்கிலாந்து வெற்றி பெற்றது.

முதல் இன்னிங்ஸில் 62 ரன்களும், இரண்டாவது இன்னிங்ஸில் 149 ரன்களும் அடித்த பென் டக்கெட் ஆட்ட நாயகன் விருது வென்றார்.

இந்த ஒரே டெஸ்ட் போட்டியில் பல சாதனைகள் படைக்கப்பட்டிருக்கின்றன. அவை...

1) 1948-க்கு பிறகு ஒரு டெஸ்ட் போட்டியில் கடைசி நாளில் 350+ இலக்கை எட்டிப்பிடித்த முதல் அணி என்ற சாதனையை இங்கிலாந்து படைத்திருக்கிறது. இதற்கு முன் 1948-ல் இங்கிலாந்துக்கெதிரான டெஸ்ட் போட்டியில் கடைசி நாளில் ஆஸ்திரேலியா 404 ரன்கள் அடித்து வெற்றி பெற்றது.

2) டெஸ்ட் வரலாற்றில் முதல் முறையாக ஒரே டெஸ்ட் போட்டியில் 5 சதங்களை இந்தியா அடித்திருக்கிறது. மொத்த ரெக்கார்டில் ஆறாவது முறையாக இவ்வாறு நிகழ்ந்திருக்கிறது.

3) 148 வருட டெஸ்ட் கிரிக்கெட் வரலாற்றில், ஒரு டெஸ்ட் போட்டியில் 5 சதங்கள் அடித்து தோல்வியடைந்த முதல் அணி என்ற மோசமான சாதனையை இந்தியா படைத்திருக்கிறது (பண்ட் 2 சதம், ஜெய்ஸ்வால், கில், ராகுல் தலா ஒரு சதம்).

4) கிரிக்கெட்டில் செனா (SENA) நாடுகள் என்றழைக்கப்படும் தென்னாப்பிரிக்கா (S), இங்கிலாந்து (E), நியூசிலாந்து (N), ஆஸ்திரேலியா (A) ஆகிய நான்கு நாடுகளிலும் மொத்தமாக அதிக விக்கெட்டுகள் வீழ்த்தியவர்களில் பட்டியலில் வாசிம் அக்ரமை (146) பின்னுக்குத் தள்ளி பும்ரா (150) முதலிடம் பிடித்திருக்கிறார்.

5) டெஸ்ட் கிரிக்கெட்டில் ஃபீல்டராக அதிக கேட்ச் பிடித்தவராக ஜோ ரூட் (154 போட்டிகளில் 210 கேட்சுகள்) சாதனை படைத்திருக்கிறார். இதற்கு முன் முன்னாள் இந்திய வீரர் ராகுல் டிராவிட் முதலிடத்தில் இருந்தார் (164 போட்டிகளில் 210 கேட்சுகள்).

6) டெஸ்ட் கிரிக்கெட்டில் ஒரு போட்டியின் இரண்டு இன்னிங்ஸிலும் சதமடித்த இரண்டாவது விக்கெட் கீப்பர் பேட்ஸ்மேன் என்ற சாதனையை ரிஷப் பண்ட் படைத்திருக்கிறார். இதற்கு முன், 2001-ல் தென்னாப்பிரிக்காவுக்கெதிரான போட்டியில் முன்னாள் ஜிம்பாப்வே விக்கெட் கீப்பர் பேட்ஸ்மேன் ஆண்டி ஃபிளவர் (142 & 199*) இச்சாதனையை நிகழ்த்தியிருந்தார்.

7) இங்கிலாந்தில் ஒரு டெஸ்ட் போட்டியின் இரண்டு இன்னிங்ஸிலும் சதமடித்த முதல் இந்திய வீரர் பண்ட்.

8) இந்த டெஸ்ட் போட்டியில் இரண்டு இன்னிங்ஸ்களையும் சேர்த்து 6.28 எக்கனாமியில் ரன்களை வாரி வழங்கியிருக்கும் பிரசித் கிருஷ்ணா, ஒரு டெஸ்ட் போட்டியில் அதிக எக்கனாமியில் ரன்களைக் கொடுத்த இந்திய பவுலர்கள் என்ற மோசமான சாதனைப் பட்டியலில் முதலிடத்தில் இருந்த வருண் ஆரோனை (2014-ல் 5.91 எக்கனாமி ) பின்னுக்குத் தள்ளி முதலிடம் பிடித்திருக்கிறார்.

சினிமா விகடனின் பிரத்யேக Whatsapp க்ரூப்

https://chat.whatsapp.com/JSk78H7siYK4aL2qO1RglR

சினிமா தொடர்பான எக்ஸ்க்ளூசிவ் அப்டேட், அசத்தல் பேட்டிகள், டி.வி அப்டேட்கள் என எதையும் மிஸ் செய்யாமல் தெரிந்து கொள்ள...

உங்கள் வாட்ஸ் அப் மூலமே இணைந்திருங்கள் சினிமா விகடனுடன்...

https://chat.whatsapp.com/JSk78H7siYK4aL2qO1RglR